Mazing: Einstök leiksýning um flótta, seiglu og sjálfsmynd í Hljómahöll

Tilraunaleikhúsið Empowering Voices frumsýnir á morgun, miðvikudaginn 15. apríl, leiksýninguna Mazing í Bergi í Hljómahöll. Sýningin er fjöltyngd og tilraunakennd þar sem fólk af ólíkum uppruna deilir persónulegri reynslu sinni af fólksflutningum og því að fóta sig í nýju samfélagi.

Verkefnið er samstarf Rauða krossins og samtakanna Community for All / Samfélag fyrir öll. Í sýningunni Mazing er fjallað um þemu á borð við stríð, flótta og það tilfinningalega ferðalag sem fylgir því að setjast að á nýjum stað.

Persónulegar sögur af sviðinu

Leikritið er skapað í nánu samstarfi við þátttakendur sjálfa. Hver flytjandi fær tækifæri til að tjá eigin reynslu og tilfinningar, sem gerir sýninguna að ríkulegri fléttu sagna þar sem fjölbreyttar raddir og menningarheimar mætast. Áhersla er lögð á seiglu mannsins, leitina að tilheyrslu og ferðalög yfir landamæri – jafnt líkamleg sem andleg.

Einstakur viðburður sem verður ekki endurtekinn

Þetta er í þriðja sinn sem Empowering Voices setur upp sýningu í Reykjanesbæ, en hópurinn er skipaður nýjum þátttakendum í hvert skipti. Því er um algjöran einstakviðburð að ræða sem verður ekki endurtekinn í þessari mynd.

Upplýsingar um sýninguna:

• Hvar: Berg, Hljómahöll.

• Hvenær: Miðvikudaginn 15. apríl kl. 19:00.

• Lengd: Rúm klukkustund.

• Aðgangseyrir: Ókeypis.

Öll eru velkomin að koma og upplifa kraftmikla og einlæga sýningu sem varpar ljósi á mannlega reynslu á tímum mikilla fólksflutninga.