Vetrarþjónusta í Vogum sinnir snjómokstri samkvæmt forgangsröðun

Undanfarna daga hefur vetrarþjónusta Sveitarfélagsins Voga staðið vörð um greiðfærni gatna og gönguleiða fyrir íbúa og umferð í bænum, segir í tilkynningu á vef sveitarfélagsins. Vinnuteymi snjómoksturs hefur unnið samkvæmt gildandi viðmiðunarreglum sveitarfélagsins þar sem lögð er rík áhersla á að tryggja að forgangsleiðir séu ávallt færar. Sérstaklega er horft til stofnbrauta, tengibrauta og leiða í næsta nágrenni við skóla og leikskóla til að tryggja öryggi og flæði umferðar.

Við snjómokstur og hálkuvarnir er unnið eftir skýru ferli þar sem helstu umferðaræðar og skólaleiðir eru ruddar fyrst. Samhliða því er lögð áhersla á að hreinsa göngustíga og helstu tengingar til að auka öryggi gangandi vegfarenda. Húsagötur eru mokaðar síðar þegar þær eru orðnar þungfærar fyrir venjuleg ökutæki og er hálkueyðing framkvæmd með salti á þeim leiðum þar sem það á við.

Sveitarfélagið minnir íbúa á að snjór er ekki mokaður frá innkeyrslum að húsum í tengslum við snjómokstur á götum. Bæjarbúum er þakkað fyrir sýnda þolinmæði en jafnframt eru íbúar hvattir til að koma ábendingum eða spurningum varðandi þjónustuna á framfæri við skrifstofu sveitarfélagsins.