Segir uppbyggingu framúrskarandi heilbrigðisþjónustu framundan fyrir íbúa Suðurnesja

Alma Möller, heilbrigðisráðherra, sagði Heilbrigðisstofnun Suðurnesja (HSS) vera eldspræka, fylgist vel með, hafa mikla aðlögunarhæfni og breytast í takt við nýja tíma. Þetta sagði Alma m.a. í ávarpi sem hún hélt á ársfundi HSS í síðustu viku. Alma þakkaði stjórnendum og starfsfólki HSS fyrir frábær störf, góðan árangur, og sagðist hlakka til að vinna með HSS á komandi misserum við uppbyggingu framúrskarandi heilbrigðisþjónustu fyrir íbúa Suðurnesja.

Heilbrigðisráðherra lofaði HSS á ársfundinum, sem haldinn var á Hótel Keflavík sl. föstudag, og nefndi margvíslegar áskoranir sem starfsfólk stofnunarinnar hefur þurft að takast á við og nefndi m.a. Reykjaneselda og þær hamfarir sem þar hafa verið, fyrst og fremst fyrir samfélagið í Grindavík.

Alma sagði það til eftirbreytni hvernig lýðheilsuvísar Landlæknis hafa verið nýttir sem mikilvægur grundvöllur við stefnumótun HSS og gott dæmi um hvernig hægt er að nýta lýðheilsuvísana á markvissan hátt og er til fyrirmyndar. Sama máli gegnir um virkt íbúasamráð og HSS hefur sýnt hvað slíkt samráð er gott og mikilvægt á báða bóga, fyrir íbúana og fyrir stofnunina og starfsfólkið.

HSS hefur náð eftirtektarverðum árangri á undanförnu starfsári, bæði í rekstri og þjónustu við samfélagið. Þetta kemur fram í nýútgefinni ársskýrslu HSS fyrir árið 2024, þar sem dregin eru fram lykilatriði í vexti og umbótum á stofnuninni.

Rekstrarafkoma HSS var jákvæð um 149 milljónir króna, sem nemur 2,5% af tekjum. Tekist hefur að lækka uppsafnaðan halla stofnunarinnar um 14,1%, meðal annars með aukinni innheimtu, skilvirkari innkaupum og samstilltu átaki starfsfólks og stjórnenda. Tekjur jukust um rúm 26% á milli ára, en gjöld aðeins um 7,4%, sem endurspeglar bætta fjármálastjórn og rekstrarvitund.

Eitt stærsta framfaraskref ársins var aukin þjónusta á bráðamóttöku HSS, sem leiddi til þess að sjúkraflutningum til Landspítala fækkaði um 64%. Þá hefur HSS tekið í notkun byltingarkennda tækni í augnskimun með gervigreind í samstarfi við RetinaRisk. Með þessu er markvisst dregið úr kostnaði og bætt aðgengi fyrir stóran hóp skjólstæðinga með sykursýki.

Íbúar á Suðurnesjum nutu einnig bættrar þjónustu með opnun nýrrar heilsugæslu í Vogum og undirbúningi að opnun í Suðurnesjabæ nú í byrjun júní. Þá var unnin ný stefna HSS til 2030 með virkri þátttöku íbúa.

Á starfsárinu voru einnig gerðar breytingar á skipuriti, lögð áhersla á öryggisfundi og unnið að umbótum í húsnæði. Áhersla á starfsánægju skilaði sér í hærri einkunnum í stofnanavísitölum en áður.

„Við höfum náð miklum árangri á stuttum tíma og ætlum að halda áfram að byggja traust og styrkja heilbrigðisþjónustuna á Suðurnesjum,“ segir Guðlaug Rakel Guðjónsdóttir, forstjóri HSS, m.a. í ársskýrslunni.