Stfs
Stfs

Fréttir

Rokkveislan mikla bíður eftir þríeykinu
Guðbrandur Einarsson, Kristján Jóhannsson og Arnór Vilbergsson fara fyrir tónlistarverkefninu Með blik í auga.
Hilmar Bragi Bárðarson
Hilmar Bragi Bárðarson skrifar
mánudaginn 10. ágúst 2020 kl. 13:58

Rokkveislan mikla bíður eftir þríeykinu

Aðstandendur Með blik í auga bíða nú eftir nýjustu tíðindum frá þríeykinu en sóttvarnayfirvöld munu ráða því hvernig tónleikahaldi verður háttað á næstu vikum.

Rokkveislan mikla var ráðgerð um Ljósanæturhelgina í Reykjanesbæ. Miðað við reglur um samkomur sem gilda í dag þá er ekki hægt að halda tónleikana á Ljósanótt í Reykjanesbæ.

Guðbrandur Einarsson, einn af forsvarsmönnum Með blik í auga, sagði í samtali við Víkurfréttir að beðið sé upplýsinga frá sóttvarnayfirvöldum en núgildandi reglur gilda til 13. ágúst.

„Það hafa nokkur hundruð miðar þegar verið seldir á viðburðinn. Það er óvissa í loftinu en það er alveg inni í myndinni hjá okkur að fresta viðburðinum lengra inn í haustið eða veturinn. Með blik í auga er ekkert bundið við það að vera á Ljósanótt. Við sjáum hvað þríeykið leggur til í vikunni og tökum ákvörðun í framhaldinu,“ sagði Guðbrandur í samtali við Víkurfréttir.