Reykjanesbær skilar betri afkomu en áætlanir gerðu ráð fyrir

Ársreikningur Reykjanesbæjar fyrir árið 2025 var staðfestur af bæjarstjórn þann 5. maí 2026. Niðurstaðan sýnir verulega bætta rekstrarafkomu miðað við áætlanir, en jákvæð rekstrarniðurstaða samstæðunnar nam 2.254 milljónum króna. Til samanburðar hafði fjárhagsáætlun gert ráð fyrir rúmlega 1,3 milljarða króna afgangi. Helsta skýringin á þessum viðsnúningi er sögð vera hærri útsvarstekjur en gert var ráð fyrir, en stefna sveitarfélagsins er að sýna íhaldssemi við áætlun tekna. Þetta kemur fram í tilkynningu frá Reykjanesbæ.

Heildartekjur samstæðunnar námu 42,4 milljörðum króna á meðan rekstrargjöld voru 34,4 milljarðar. Rekstrarniðurstaða fyrir afskriftir og fjármagnsliði var sömuleiðis sterk og nam 8 milljörðum króna hjá samstæðunni. Þegar horft er til A-hluta bæjarsjóðs voru tekjur 28,5 milljarðar og afgangur nam 440 milljónum króna, sem er töluvert umfram þær 186 milljónir sem áætlaðar voru í viðauka við fjárhagsáætlun.

Aukið veltufé frá rekstri á árinu var nýtt til að mæta mikilli íbúafjölgun síðustu ára. Ráðist var í víðtæka innviðauppbyggingu og mikilvæg viðhaldsverkefni, þar sem sérstök áhersla var lögð á að bregðast við rakaskemmdum í skólahúsnæði og öðrum stofnunum bæjarins. Fjárfestingar á árinu voru umfangsmiklar og námu alls tæpum 8 milljörðum króna hjá samstæðunni í heild en 4,6 milljörðum í bæjarsjóði.

Eignir samstæðu Reykjanesbæjar nema nú 108 milljörðum króna og er fjárhagsstaðan sögð stöðug. Skatttekjur og framlög úr jöfnunarsjóði námu 1.033 þúsund krónum á hvern íbúa á árinu 2025, sem er aukning frá því árið áður. Þrátt fyrir nýjar lántökur upp á 6,5 milljarða króna er skuldaviðmið samstæðunnar 107,55%, sem er vel innan settra marka, og nema skuldir á hvern íbúa 1.585 þúsund krónum.