Opinn íbúafundur í Reykjanesbæ með innviðaráðherra

Opinn samráðsfundur með Eyjólfi Ármannssyni innviðaráðherra með íbúum Suðurnesja verður haldinn í Reykjanesbæ mánudaginn 18. ágúst kl. 16:30. Fundurinn verður haldinn á Radisson Park Inn og er öllum opinn.

Í tilkynningu frá Innviðaráðuneytinu kemur fram að tilgangur fundarins sé að kalla eftir sjónarmiðum íbúa og sveitarstjórnarfólks um málaflokka ráðuneytisins – samgöngur, sveitarstjórnar- og byggðamál og fjarskipti og stafræna innviði. Það mun m.a. nýtast í vinnu við stefnumótun og undirbúning áætlana á vegum ráðuneytisins.

Fundurinn er liður í röð samráðsfunda innviðaráðherra um land allt en þeir eru skipulagðir í samvinnu við landshlutasamtök sveitarfélaga.

Auk ráðherra mun Berglind Kristinsdóttir, framkvæmdastjóri Sambands sveitarfélaga á Suðurnesjum (SSS) flytja erindi á fundinum. Fundarstjóri er Halldóra Fríða Þorvaldsdóttir, formaður SSS. Að erindum loknum verður opnað fyrir almennar umræður.