Leiðtogaprófkjör hjá Sjálfstæðisflokknum í Reykjanesbæ
Fulltrúaráð sjálfstæðisfélaganna í Reykjanesbæ ákvað á félagsfundi sínum í kvöld að halda leiðtogaprófkjör 31. janúar fyrir komandi sveitarstjórnarkosningar. Á fundinum kom fram að nokkrir einstaklingar hafi lýst yfir áhuga á að bjóða sig fram en þeir voru ekki nafngreindir. Einn þeirra er Unnar Sigurðsson, skólastjóri í Háaleitisskóla. Hann staðfesti það við VF í kvöld.
Vitað er að Vilhjálmur Árnason, þingmaður og ritari Sjálfstæðisflokksins er að íhuga að bjóða sig fram.
Haldið verður leiðtogaprófkjör og svo mun uppstillingarnefnd koma með tillögu að frambjóðendum í 2.–22. sæti listans, sem síðan verður lögð fyrir fulltrúaráðið til samþykktar.
Yfirkjörstjórn mun á næstunni senda frá sér tilkynningu um fyrirkomulag leiðtogaprófkjörsins. Á fundinum var samþykkt að Jóna Hrefna Bergsteinsdóttir yrði formaður yfirkjörstjórnar.
Eftirfarandi einstaklingar skipaðir í uppstillingarnefnd:
- Sigurgeir Rúnar Jóhannsson
- Axel Jónsson
- Jóna Hrefna Bergsteinsdóttir
- Hermann Helgason
- Anna Lydía Helgadóttir
- Guðni Ívar Guðmundsson
- Andri Örn Víðisson
Í tilkynningu frá fulltrúaráði Sjálfstæðisflokksins í Reykjanesbæ kemur fram að fundurinn hafi verið vel sóttur og mikill hugur væri í Sjálfstæðismönnum. Jafnframt var Margréti Sanders, oddvita flokksins, þakkað vel unnin störf síðustu tvö kjörtímabil.
