Húsnæðisáætlun Reykjanesbæjar samþykkt: 3.154 íbúðir á tíu árum

Bæjarstjórn Reykjanesbæjar samþykkti á fundi sínum 3. febrúar 2026 húsnæðisáætlun Reykjanesbæjar 2026 í síðari umræðu. Áætlunin var samþykkt með 7 atkvæðum gegn 4, þar sem meirihlutinn greiddi atkvæði með en fulltrúar Umbótar og Sjálfstæðisflokks greiddu atkvæði á móti.

Í bókun meirihluta bæjarstjórnar, sem Guðný Birna Guðmundsdóttir (S) lagði fram, segir að húsnæðisuppbygging eigi að byggjast á langtímasýn og jafnvægi í framboði. Samkvæmt áætluninni er gert ráð fyrir uppbyggingu um 3.154 íbúða á næstu tíu árum, þar af 456 sérbýla, eða 14,4%.

Meirihlutinn bendir á að hlutfall sérbýla í Reykjanesbæ sé í dag um 43%, en verði áætlanir að veruleika fari það niður í 33%. Þrátt fyrir það verði hlutfall sérbýla áfram hærra en í mörgum sambærilegum sveitarfélögum. Í bókun meirihlutans er tekið dæmi um að á Akureyri og í Hafnarfirði sé hlutfall sérbýla um 15–20%.

Meirihlutinn segir uppbygginguna endurspegla raunverulega eftirspurn og tryggja fjölbreytt búsetuform, þar sem gert sé ráð fyrir bæði fjölbýli og sérbýli. Þá er lögð áhersla á að húsnæðismál snúist ekki aðeins um magn heldur líka gæði, val og möguleika íbúa til að velja búsetuform eftir aðstæðum.

Í bókun meirihlutans er einnig vísað til samanburðar við húsnæðisáætlanir annarra sveitarfélaga á Suðurnesjum og við sambærileg sveitarfélög. Þar er meðal annars tekið fram að samkvæmt gögnum um íbúðir í byggingu sé Reykjanesbær með 38 einbýli, 27 par- og raðhús og 443 íbúðir í fjölbýli í byggingu. Meirihlutinn segir jafnframt að í Reykjanesbæ sé eftirspurn mest eftir fjölbýli en minnst eftir einbýlum og að bæjarfélagið sé „eitt af fáum sveitarfélögum“ sem nái að anna eftirspurn eftir lóðum.

„Að halda því fram að ekki sé nægjanlegt framboð af uppbyggingu einbýla er einfaldlega ekki rétt,“ segir í bókun meirihlutans.

86% uppbyggingar verði fjölbýli – „þrengir valkosti íbúa“

Margrét Þórarinsdóttir (U) lagði fram bókun fyrir hönd Umbótar og Sjálfstæðisflokks þar sem fram kemur að flokkarnir leggist gegn húsnæðisáætlun meirihlutans og greiði atkvæði á móti.

Þar segir að í fyrri umræðu hafi verið bent á að áætlunin endurspegli hvorki vilja íbúa né fjölbreyttar þarfir samfélagsins, og að engin efnisleg breyting hafi verið gerð þrátt fyrir þær ábendingar.

Í bókun minnihlutans kemur fram að áætlunin geri ráð fyrir að 86% allrar uppbyggingar næstu tíu ára verði fjölbýli, á meðan hlutur sérbýlis sé „verulega takmarkaður“. Þeir segja þetta ganga gegn niðurstöðum kannana og eftirspurn íbúa, þar sem vilji sé fyrir meiri fjölbreytni í búsetuformum, þar á meðal sérbýli.

Minnihlutinn segir meirihlutann jafnframt viðurkenna í eigin gögnum að eftirspurn eftir einbýlis- og parhúsalóðum hafi aukist en haldi samt áfram stefnu sem „þrengir valkosti íbúa“ og sé mótuð ofan frá og niður.

„Húsnæðisuppbygging á að byggja á þörfum fólksins sem hér býr, ekki einhliða pólitískri stefnu,“ segir í bókun Umbótar og Sjálfstæðisflokks. Þar er einnig lögð áhersla á að Reykjanesbær eigi að þróast í takt við íbúana, „ekki þvert á vilja þeirra“.

Húsnæðisáætlunin var samþykkt með atkvæðum meirihluta bæjarstjórnar: fulltrúa Samfylkingar, Framsóknar og Beinnar leiðar. Fulltrúar Umbótar og Sjálfstæðisflokks greiddu atkvæði gegn áætluninni.