Halli á sjúkraflutningum stefnir í 48 milljónir

Halli á rekstri sjúkraflutninga á Suðurnesjum er áætlaður um 48 milljónir króna árið 2026, samanborið við 14 milljónir árið áður. Allir bæjarfulltrúar Reykjanesbæjar standa að áskorun til heilbrigðisráðherra og Sjúkratrygginga Íslands um að greiðslur ríkisins standi að fullu undir raunkostnaði þjónustunnar.

Gunnlaugur Kárason, bæjarfulltrúi Miðflokks og formaður bæjarráðs, kynnti sameiginlega bókun bæjarstjórnar Reykjanesbæjar á dögunum. Þar er lýst þungum áhyggjum af vanfjármögnun ríkisins og vísað til kostnaðargreiningar Deloitte.

Samkvæmt tölunum sem kynntar voru eykst hallinn um 34 milljónir króna milli ára. Á sama tíma og laun og annar rekstrarkostnaður hækka lækka greiðslur vegna þjónustunnar, að því er segir í bókuninni.

Auknar kröfur án samsvarandi fjármagns

Bæjarstjórnin bendir á að sjúkraflutningar séu á ábyrgð ríkisins og greiðslur Sjúkratrygginga Íslands eigi að standa undir kostnaði við þá. Kröfur til þjónustunnar hafi aukist án þess að fjármögnun hafi fylgt þeirri þróun.

Þá hafi íbúum á Suðurnesjum fjölgað hratt. Áframhaldandi fjölgun muni kalla á meiri þjónustu og aukna viðbragðsgetu. Bæjarfulltrúarnir telja því nauðsynlegt að fjármögnunin taki mið af raunverulegu umfangi verkefnisins.

Sameinast um kröfuna til ríkisins

Bæjarráð hafði áður staðið sameinað að sams konar bókun. Gunnlaugur sagði bæjarstjórn taka undir hana og allir ellefu bæjarfulltrúarnir rituðu undir áskorunina.

Ekki var kynnt samkomulag við ríkið um að brúa fjármögnunarbilið. Þá kom ekki fram að samþykkt hefði verið að skerða þjónustuna vegna hallans. Krafa bæjarstjórnar er að ríkið tryggi að greiðslur endurspegli kostnaðinn við að veita hana.