Gáfu milljón í Björgunarbátasjóð Suðurnesja í minningu Hannesar Þ. Hafstein

Börn Hannesar Þ. Hafstein hafa fært Björgunarbátasjóði Suðurnesja eina milljón króna. 100 ára ártíð Hannesar Þ. Hafstein var í gær, 29. nóvember en björgunarskipið í Sandgerði ber nafn Hannesar. Hans var sérstaklega minnst á fulltrúaráðsfundi Landsbjargar laugardaginn 22. nóvember en við það tækifæri var gjöfin afhent.

Hannes Þórður Hafstein fæddist á Húsavík þann 29. Nóvember 1925 og sinnti mörgum störfum innan félagsins á síðustu öld.

Hannes hóf störf hjá Slysavarnafélagi Íslands (SVFÍ) árið 1964 fyrst sem erindreki, varð svo framkvæmdastjóri frá 1978 og svo forstjóri frá 1986-1992. Það sem Hannes gerði ekki á þessum tíma var fátt. Hann skipulagði framkvæmd breytinga í hægri umferð árið 1968, vann að stofnun tilkynningarskyldu íslenskra skipa sama ár, vann að þróun og síðar stofnun Slysavarnaskóla sjómanna árið 1985 og var vakinn og sofinn í störfum sínum fyrir félagið alla tíð.

Hannes fékk fjöldann allan af viðurkenningum fyrir störf sín tengt leit og björgun. Hann var heiðraður í Bandaríkjunum, Bretlandi, Þýskalandi og Færeyjum, og var gerður að heiðursfélaga International Association for Sea Survival Training árið 1992. Heima á Íslandi hlaut hann einnig margar viðurkenningar, meðal annars hina íslensku fálkaorðu.