Endurskipulagning húsnæðis í Njarðvíkurskóla og Hjallatúni til skoðunar

Húsnæðismál í tveimur af menntastofnunum Reykjanesbæjar voru til umfjöllunar á fundum menntaráðs og bæjarráðs á dögunum. Um er að ræða breytingartillögu við leikskólann Hjallatún og hugmyndir um heildarendurskoðun á húsnæði Njarðvíkurskóla.

Starfsmannaaðstaða bætt í Hjallatúni

Á fundi menntaráðs 11. apríl kynnti Ólöf Magnea Sverrisdóttir, leikskólastjóri Hjallatúns, tillögu um að breyta norðurgangi leikskólans, viðbyggingu frá árinu 2014, í starfsmannaaðstöðu og sérinngang fyrir starfsfólk. Jafnframt yrðu tvær litlar deildir fluttar úr norðurganginum yfir í rými sem nú eru notuð sem skrifstofur stjórnenda.

Með breytingunni myndi starfsaðstaða starfsfólks batna til muna, sameiginleg rými skólans nýtast betur og þörfin fyrir færanlega kennslustofu á lóðinni hverfa.

Menntaráð tók vel í erindið og vísaði því til bæjarráðs, sem samþykkti að fela Helga Arnarsyni, sviðsstjóra menntasviðs, að vinna nánari þarfagreiningu í samræmi við verklagsreglu um framkvæmdir og húsnæðisbreytingar.

Heildræn endurskoðun á Njarðvíkurskóla

Á sama fundi menntaráðs kynnti Rafn Markús Vilbergsson, skólastjóri Njarðvíkurskóla, þá ósk að farið verði í heildrænt hönnunarferli fyrir húsnæði skólans. Hann benti á mikilvægi þess að greina þarfir skólans bæði til skemmri og lengri tíma og aðlaga bygginguna að nýjum áskorunum í starfsemi skólans.

Menntaráð tók einnig jákvætt í þá tillögu og vísaði henni til bæjarráðs. Bæjarráð samþykkti að fela Helga Arnarsyni sviðsstjóra að vinna þarfagreiningu fyrir verkefnið á sama grundvelli og hjá Hjallatúni.