Dreginn bilaður til hafnar í Grindavík

Björgunarsveitin Þorbjörn í Grindavík var kölluð út snemma í morgun þegar tilkynning barst um bát í vanda um fimm sjómílur suðaustur af Grindavík. Báturinn var með bilaðan gír og komst hvorki áfram né afturábak, og var því óskað eftir aðstoð björgunarskipsins Odds V. Gíslasonar.

Oddur V. Gíslason lagði af stað úr Grindavíkurhöfn rétt fyrir klukkan níu og var kominn að bátnum um hálftíma síðar. Samkvæmt upplýsingum frá björgunarsveitinni gekk greiðlega að koma taug á milli skipanna og hófst drátturinn stuttu síðar. Ferðin gekk vel og var komið með bátinn örugglega til hafnar um hádegisbilið.

Með fréttinni fylgja myndir sem teknar voru við björgunarstörfin í morgun, en þær sýna vel aðstæður á vettvangi þar sem sjófarendum var komið til bjargar.