Deiliskipulag Gauksstaða auglýst að nýju eftir úrskurð nefndar
Bæjarráð Suðurnesjabæjar hefur samþykkt að auglýsa tillögu að deiliskipulagi við Gauksstaði í Garði að nýju. Ákvörðunin kemur í kjölfar úrskurðar Úrskurðarnefndar umhverfis- og auðlindamála sem felldi fyrra skipulag úr gildi vegna annmarka á málsmeðferð.
Málið á sér nokkra sögu, en deiliskipulagið var upphaflega samþykkt í bæjarráði þann 25. júní 2025. Í kjölfarið var sú ákvörðun kærð til úrskurðarnefndarinnar sem komst að þeirri niðurstöðu að endurtaka yrði auglýsingaferlið.
Skortur á umhverfismati í upphafi
Meginástæða þess að úrskurðarnefndin felldi skipulagið úr gildi var sú að hún taldi verulegan ágalla hafa verið á kynntri tillögu þar sem „ekkert eiginlegt umhverfismat“ var að finna þegar hún var fyrst auglýst í nóvember 2024.
Þótt Suðurnesjabær hafi í kjölfarið bætt úr umhverfismatinu og gert breytingar á skipulaginu til að koma til móts við athugasemdir íbúa, meðal annars varðandi þungaflutninga og staðsetningu þjónustuhúss, taldi nefndin að þessar úrbætur væru það umfangsmiklar að þær teldust breytingar á grundvallaratriðum. Því hefði átt að gefa almenningi kost á að segja álit sitt á nýju umhverfismati með annarri opinberri auglýsingu.
Bærinn vandaði til verka
Bæjarráð bókaði á fundi sínum þann 11. mars sl. að starfsmenn og kjörnir fulltrúar hefðu vandað til verka á öllum stigum málsins. Bent var á að leitað hefði verið faglegrar ráðgjafar og reynt að lágmarka neikvæð áhrif framkvæmda fyrir nágranna.
Þá vekur bæjarráð athygli á því að Skipulagsstofnun hafi farið yfir málið á sínum tíma, eftir að búið var að bæta við umhverfismatinu, án þess að gera athugasemdir við málsmeðferðina.
Næstu skref
Til að bregðast við úrskurðinum og tryggja rétta málsmeðferð hefur bæjarráð nú falið skipulagsfulltrúa að:
- Auglýsa tillöguna að nýju í samræmi við skipulagslög.
- Gefa almenningi tækifæri á að kynna sér heildstætt umhverfismat og koma með athugasemdir.
Með þessu vill Suðurnesjabær tryggja að ferlið sé hafið yfir vafa og að lýðræðislegur réttur íbúa til að fjalla um umhverfisáhrif verkefnisins sé virtur.
