Borað eftir köldu vatni í varavatnsbóli á mánudag
Borun hefst á mánudag eftir köldu vatni í nýju varavatnsbóli fyrir Suðurnes. Borað er við Árnarétt í heiðinni milli Garðs og Sandgerðis í Suðurnesjabæ en þaðan fengu Garðmenn sitt vatn um árabil. Vatnið á þessu svæði er sagt í miklum gæðum.
HS Orka og HS Veitur vinna í nánu samstarfi við Orkustofnun og Almannavarnadeild Ríkislögreglustjóra að neyðaráætlun þar sem bæði er gert ráð fyrir varavatnsbóli og einnig neyðarhitaveitu.
Búið er að gefa út nýtingarleyfi fyrir vatnsbólið við Árnarétt. Það mun leysa af vatnsbólið í Lágum ef það fer undir hraun.
Meðfylgjandi ljósmynd tók Hilmar Bragi á laugardag en þá var búið að reisa jarðbor á svæðinu við Árnarétt og allt að verða tilbúið í borun. eftir vatninu. Á svæðinu er stutt í vatnslögnina sem liggur í Garð og tengist dreifikerfi fyrir kalt vatn sem kemur úr Lágum.
