Verslun Hagkaups lokar á Fitjum

Hagkaup stefnir að því að loka sérvöruverslun sinni í Njarðvík í apríl næstkomandi. Breyttar áherslur innan Hagkaups eru ein helsta ástæða lokunarinnar.

Starfsfólki verslunarinnar var tilkynnt um fyrirhugaða lokun í dag. Um er að ræða átta starfsmenn í fjórum stöðugildum.

„Árið 2007 létum við þann draum rætast að opna minni útgáfu af Hagkaup þar sem eingöngu yrði seld sérvara með sérstaka áherslu á fatnað og skó. Á síðustu misserum hefur orðið gríðarleg breyting á neysluvenjum Íslendinga og hefur Hagkaup fylgt þeirri þróun með því að draga verulega úr sölu á fatnaði. Af þessum sökum höfum við tekið þá erfiðu ákvörðun að loka sérvöruverslun okkar í Njarðvík nú í apríl. Við erum þakklát fyrir árin hér á Suðurnesjum og þökkum viðskiptavinum og starfsfólki okkar fyrir frábæran tíma,“ segir Sigurður Reynaldsson, framkvæmdastjóri Hagkaups.