Vinstri Grænir
Vinstri Grænir

Viðskipti

Hraðhleðslustöðvar settar upp við verslanir Samkaupa
Mánudagur 31. maí 2021 kl. 09:53

Hraðhleðslustöðvar settar upp við verslanir Samkaupa

Samkaup hefur gert samning við Ísorku og mun bjóða upp á rafhleðslustöðvar við verslanir víða um land. Áætlað er að fyrsta rafhleðslustöðin verði opnuð við verslun Nettó í Borgarnesi á komandi sumri og í kjölfarið munu fleiri verslanir bjóða upp á hleðslustöðvar.

„Þróunin á þessum markaði er gríðarlega spennandi og í upphafi þessa árs voru seldir fleiri nýir bílar sem knúnir eru rafmagni en bensíni eða dísilolíu. Verslunarnet Samkaupa nær um allt land og við búumst við að þessari þjónustu verði vel tekið af okkar viðskiptavinum sem og ferðamönnum, erlendum og innlendum,“ segir Gunnar Egill Sigurðsson, framkvæmdastjóri verslunarsviðs Samkaupa.

Viðreisn
Viðreisn

Rafhleðslustöðvar Samkaupa eru að lágmarki 150KW og eru eingöngu hannaðar fyrir rafbíla sem geta hraðhlaðið. Áætlanir gera ráð fyrir að þær verði settar upp við að minnsta kosti helming verslana félagsins en Samkaup rekur rúmlega 60 verslanir víðsvegar um landið undir vörumerkjunum Nettó, Krambúðin, Kjörbúðin og Iceland.

„Það er mikið ánægjuefni að fá Ísorku í lið með okkur í orkuskiptunum. Við teljum þetta bæði mikilvægan en jafnframt eðlilegan þátt í samfélagslegri ábyrgð fyrirtækisins,“ segir Gunnar Egill. „Þróunin virðist vera sú að rafknúnir bílar séu að sækja í sig veðrið og því mikilvægt að koma til móts við þær þarfir viðskiptavina okkar. Þar að auki er það stefna stjórnvalda að rafvæða samgöngur á Íslandi fyrir árið 2030 og við viljum leggja okkar af mörkum til hraðari orkuskipta og hreinni jarðar.“

Ísorka rekur í dag yfir 900 hleðslustöðvar á Íslandi. Um 450 þeirra eru aðgengilegar almenningi, aðrar í fjölbýlum og við fyrirtæki í skertu aðgengi. Notendur Ísorku eru yfir 5.000 og nýta að meðaltali 600 þeirra hleðslustöðvar daglega.

Gunnar Egill Sigurðsson, framkvæmdastjóri verslunarsviðs Samkaupa.