Keflavíkurstelpurnar fá Benný til að brosa

Benedikta S. Benediktsdóttir er úr Garðinum. Hún er 50 ára í ár og bý í Keflavík. Hún er ein af „fótboltamömmunum“ í kvennaboltanum í Keflavík. Árangur Keflavíkur í boltanum í sumar er henni líka hugleikinn og hefur fengið hana til að brosa breitt síðustu daga þegar ljóst var að stelpurnar hennar hafa tryggt sæti í efstu deild næsta sumar. Víkurfréttir áttu gott netspjall við Benediktu, eða Benný, þar sem hún svaraði spurningum um allt milli himins og jarðar.

– Hvað er það fyrsta sem þú gerir eftir að þú vaknar á morgnana?

Ég byrja á að taka inn vítamín og búa um.

– Hlustarðu á útvarp eða eitt og eitt lag á Spotify?

Ég hlusta mjög mikið á tónlist allan daginn bæði í útvarpi og Spotify.

– Hvað raular þú eða syngur í sturtu/baði?

Já, eitthvað gott hverju sinni enda er ég alæta á tónlist.

– Hvaða blöð eða bækur lestu?

Ég vafra um á netinu og skoða miðlanna.

– Hvað er það fyndnasta sem hefur hent þig?

Þegar Magnús tengdasonur fór í kapphlaup við mig og ég fleytti kerlingar. Hann var mjög miður sín, enda okkar fyrstu kynni en við grenjuðum úr hlátri eftir á.

– Hver fékk þig síðast til að brosa og hvers vegna?

Þegar ég sá að stelpurnar mínar eru pottþéttar upp í Pepsi Max-deildina 2021.

– Hvað er það skemmtilegasta sem þú horfðir á nýlega í sjónvarpi?

Síðasta veiðiferðin, hún er geggjuð.

– Uppáhaldsvefsíða:

Fótbolti.net

– Uppáhaldskaffi eða -te:

Ég drekk kaffi og Morgundögg frá Kaffitári er í uppáhaldi.

– Uppáhaldsverslun:

Nettó.

– Hvað matreiðir þú ef þú vilt gera eitthvað gott fyrir fjölskylduna?

Elda læri með öllu og ís með Mars-sósu í eftirrétt.

– Hvað fer mest í taugarnar á þér?

Ef Keflavík tapar, bæði kvenna og karla.

– Hver er helsta áskorun sem þú hefur þurft að takast á við nýverið?

Vera þolinmóð í veiðinni.

– Hvað er eftirminnilegast frá sumrinu?

Að verða 50 ára og fresta partýi og bara allt Covid-brjálæðið.

– Hvaða reglu hefur þú sett þér sem erfiðast er að fara eftir?

Að hætta að borða nammi.

– Ef þú værir að setjast á skólabekk í dag, hvað myndir þú vilja læra?

Ég myndi vilja læra sálfræði.

– Stóra fréttin síðustu daga:

Að stelpurnar spila í Pepsi Max-deildinni 2021.

– Hvernig er haustið að leggjast í þig?

Bara vel. Ég reyni að vera alltaf jákvæð, sama hvaða árstíð er.

– Eru hefðir á þínu heimili tengdar haustinu?

Nei. Fór oft í réttir norður í land hér áður og sakna þess í dag.

Benný og Björgvin Magnússon maður hennar.