Sjálfstæðisflokkurinn 13. - 26. sept
Sjálfstæðisflokkurinn 13. - 26. sept

Íþróttir

Íslandsmótið í knattspyrnu á lokametrunum
Marley Blair gerði Keflvíkingur engan greiða með því að missa stjórn á skapi sínu og láta reka sig af velli í fyrri hálfleik.
Jóhann Páll Kristbjörnsson
Jóhann Páll Kristbjörnsson skrifar
mánudaginn 30. ágúst 2021 kl. 10:16

Íslandsmótið í knattspyrnu á lokametrunum

Það var mikið um að vera á knattspyrnuvöllum landsins um helgina, það styttist í síðustu umferðir Íslandsmótsins og er spennan mikil í flestum deildum – og úrslit helgarinnar minnkuðu ekki spennuna. Suðurnesjaliðin eru flest í harðri baráttu, ýmist um að forðast fallsæti eða sigur.

Keflavík missti af mikilvægum stigum í fallbaráttu Pepsi Max-deildar karla

Keflvíkingar léku í Kórnum gegn HK sem var í fallsæti fyrir leikinn. Gríðarlega mikilvægur leikur fyrir bæði lið en Keflavík er í fjórða neðsta sæti með átján stig.

Keflavík varð fyrir áfalli í fyrri hálfleik þegar Marley Blair missti stjórn á skapi sínu og sló til leikmanns HK, hann fékk réttilega að líta rauða spjaldið og Keflvíkingar því einum færri (22').

Viðreisn
Viðreisn

Fyrri hálfleikur var frekar bragðdaufur og það var ekki fyrr en á 74. mínútu að fyrsta markið leit dagsins ljós. Það var Keflvíkingurinn fyrrverandi, Stefan Alexander Ljubicic, sem skoraði þá fyrir HK og kom þeim í forystu. Keflvíkingar reyndu hvað þeir gátu að jafna en tvær frábærar markvörslur hjá markverði HK í uppbótartíma gerðu út um þær vonir þeirra.

Úrslitin gera stöðuna í neðsta hluta deildarinnar mjög jafna en ÍA situr á botninum með tólf stig, næstu þrjú lið eru mjög jöfn. Keflavík er fjórða neðst með átján stig, þá kemur HK með sautján og Fylkir með sextán. Þegar eftir eru þrjár umferðir er ljóst að ekkert þessara liða má við því að misstíga sig á lokametrunum.

Dramatík í Grindavík

Það gengur lítið hjá Grindavík í Lengjudeild karla. Grindavík tók á móti Kórdrengjum á laugardag og voru það gestirnir sem komust yfir á 30. mínútu.

Skömmu fyrir leikslok virtist loks eitthvað ætla að falla með Grindvíkingum þegar leikmaður gestanna skoraði sjálfsmark (88') en í uppbótartíma gerður Kórdrengir út um þær væntingar með sigurmarki (90'+2). Sjötta tap Grindavíkur í síðustu sjö leikjum og orðið endanlega ljóst að þeir fara ekki upp í ár.

Sigurbjörn Hreiðarsson, þjálfari Grindavíkur, þarf að finna út úr vandræðagangi Grindvíkinga en liðið hefur ekki staðið undir þeim væntingum sem til þeirra voru gerðar í ár.

Spennan eykst í annarri deild karla

Þróttur situr sem fyrr í efsta sæti annarrar deildar karla þrátt fyrir tap gegn Völsungi um helgina. Völsungur er komið í annað sæti, tveimur stigum á eftir Þrótti, og KV er í því þriðja, fjórum stigum frá toppnum.

Leikur Þróttar og Völsungs var leikinn fyrir norðan. Snemma í leiknum komst Völsungur yfir þegar þeir sendu boltann inn í teiginn, engin hætta virtist vera af sendingunni en boltinn lenti við fætur Rafal Stefáns Daníelssonar, markmanns Þróttar, og virtist breyta um stefnu og fór í netið (8'). Afskaplega klaufalegt á að horfa.

Aðeins tveimur mínútum síðar var leikmanni Völsungs vikið af velli með rautt spjald en Þróttur náði ekki að jafna leikinn þrátt fyrir að liggja í sókn. Leikurinn fór að mestu fram við vítateig heimamanna sem „parkeruðu strætónum“ og náðu að hanga á þessu eina marki.

Rafal Stefán nagar sig sennilega í handarbökin eftir að hafa fengið klaufalegt mark á sig gegn Völsungi.

Njarðvík er ennþá í baráttunni um sæti í næstefstu deild. 

Njarðvíkingar áttu ekki í miklum vandræðum með KF þegar leikið var á Ólafsfjarðarvelli um helgina. Eftir markalausan fyrri hálfleik voru það Skotarnir Marc McAusland (62') og Kenneth Hogg (85') sem skoruðu sitt marki hvor og Njarðvíkingar lönduðu 0:2 sigri.

Þegar þrjár umferðir eru óleiknar er Njarðvík í fjórða sæti með 32 stig, aðeins fjórum stigum á eftir Völsungi sem er í öðru sæti.

Hogg hefur skorað tólf mörk á Íslandsmótinu í sumar.

Víðismenn gerðu góða ferð í Árbæinn þegar þeir lögðu Elliða að velli

Það voru heimamenn sem komust yfir snemma í fyrri hálfleik (6') og höfðu eins marks forystu í leikhléi.

Víðir jafnaði leikinn snemma í þeim síðari þegar Jóhann Þór Arnarsson skoraði úr vítastpyrnu (53'). Aðeins mínútu síðar kom Atli Freyr Ottesen Pálsson Víði yfir (54') og Jóhann Þór jók forystuna með marki úr annari vítaspyrnu á 70. mínútu.

Elliði minnkaði muninn sex mínútum síðar (76') en Sasha Uriel Litwin Romero skoraði fjórða mark Víðis í uppbótatíma (90'+3) og gulltryggði góðan sigur.

Víðir siglir lygnan sæ í þriðju deild karla, er í áttunda sæti og hvorki á leiðinni upp né niður.

Jóhann Þór Arnarson var öruggur af vítapunktinum og skoraði tvö mörk úr vítaspyrnum gegn Elliða.