Slökkvilið kallað í nýja plastverksmiðju á Ásbrú

 

Slökkvilið Brunavarna Suðurnesja var kallað út á tíunda tímanum í morgun í nýja plastverksmiðju Borgarplast sem verið er að setja upp í húsnæði Atlantic Studios á Ásbrú. Eldur komst í klæðningu í útvegg.

 

Starfsmenn í húsinu voru búnir að slökkva eldinn þegar slökkvilið kom á staðinn. Slökkviliðsmenn voru fljótir á vettvang þar sem þeir voru í heilsurækt skammt frá útkallsstaðnum. 

 

Slökkviliðsmenn gengu úr skugga um það að engar glæður væru í veggnum og var verkefninu lokið á örfáum mínútum.

 

Myndirnar voru teknar á vettvangi í morgun. VF-myndir: Hilmar Bragi