Samið við Hópbíla um Strætóakstur á leið 55

Samband sveitarfélaga á Suðurnesjum hefur samið við Hópbíla og Hópbifreiðar Kynnisferða ehf. um almenningssamgöngur á Suðurnesjum. Hópbílar taka við akstri á leið 55, sem er akstur milli Suðurnesja og höfuðborgarsvæðisins en Hópbifreiðar Kynnisferða ehf. sjá um akstur á leið 89 sem er akstur milli Reykjanesbæjar, Sandgerðis og Garðs.

 

Á fundi stjórnar Sambands sveitarfélaga á Suðurnesjum, sem haldinn var þann 28.desember sl., var tekin ákvörðun vegna útboðsmála og lagt var mat á endanlegar lausnir, verðtilboð og tilboðum gefin stig samkvæmt því.

 

Tilboð Hópbíla í verkhluti 1 (leið 55) var upp á kr. 148.619.484,-, heildareinkunn 98. Tilboð Hópbifreiða Kynnisferða ehf. í verkhluta 2 (leið 89) var upp á kr. 32.183.625, heilareinkunn 97. Samtals hljóðar verkið upp á kr. 180.803.109,-  

 

Stjórn Sambands sveitarfélaga á Suðurnesjum staðfesti á fundi sínum að samið verði við Hópbíla hf. um verkhluta 1 og Hópbifreiðar Kynnisferða ehf. um verkhluta 2 og var VSÓ ráðgjöf falið að tilkynna þátttakendum þá ákvörðun. 

 

Samkvæmt 86. gr. laga um opinber innkaup nr.120/2016 þurfa að líða a.m.k. 10 dagar frá ákvörðun þessi um val á tilboði er tilkynnt þar til tilboðið er endanlega samþykkt.

 

SBK/ABK ehf. mun því sjá um þennan akstur þar til nýr akstursaðili tekur við þann 8. janúar 2018. Engar breytingar eru á leiðarkerfi né tímatöflum. Strætó mun jafnframt sjá um þá þætti sem þeir sáu um áður. Eina sem notendur ættu að verða varir við eru nýir vagnar og aðrir bílstjórar.