Góður árangur í innheimtu í Vogum

Innheimta opinberra gjalda á vegum Sveitarfélagsins Voga gengur vel. Nú liggur fyrir að aukning var á greiðsluhraða út frá fjölda krafna milli áranna 2014 og 2015. Hlutfall greidds höfuðstóls hækkaði jafnframt á milli ára, og meira en hjá meðalsveitarfélaginu.

Fjöldi innsendra mála í s.k. milliinnheimtu hefur dregist saman um 39,2% frá árinu 2013, og fjöldi innsendra kennitalna einstaklinga hefur fækkað um 26,3% frá árinu 2013. Af þessari þróun má draga þá ályktun að fjárhagsstaða hafi almennt batnað hjá íbúum sveitarfélagsins, sem er sérstakt fagnaðarefni, segir Ásgeir Eiríksson, bæjarstjóri í Vogum í fréttabréfi sem hann heldur úti í Sveiarfélaginu Vogum.

„Þessum árangri er einnig að þakka vönduðum og faglegum vinnubrögðum við innheimtuna, þar sem leiðarstefið er að mæta öllum greiðendum með góðar lausnir að markmiði,“ segir Ásgeir jafnframt.