Viðskipti

Hætta sáttir eftir fjörutíu ár
Sverrir með þeim Birni og Þórði fyrir framan hjólabarðaþjónustuna við Básveg í Keflavík.
Páll Ketilsson
Páll Ketilsson skrifar
föstudaginn 29. apríl 2022 kl. 07:34

Hætta sáttir eftir fjörutíu ár

Sverrir Gunnarsson í Nýsprautun tekur við rekstri hjólbarðaþjónustu Björns og Þórðar í Keflavík.

 „Við erum sáttir. Þetta er orðið fínt eftir fjörutíu ár en líka búið að vera skemmtilegt,“ sögðu þeir Björn og Þórður en þeir félagar fagna fjörutíu árum í rekstri hjólbarðaverkstæðis og smurstöðvar með því að segja þetta gott. Eru búnir að selja húsnæðið og reksturinn. 

Þeir Björn Marteinssson og Þórður Ingimarsson hafa selt Sverri Gunnarssyni í Nýsprautun reksturinn en hann er enginn nýgræðingur í flestum sem kemur að bílum. „Það er gaman að taka við að þeim félögum sem hafa verið lengst í hjólbarða- og smurþjónustu á Suðurnesjum. Þeir seldu að vísu smurþjónustuna fyrir nokkru síðan en nú var kominn tími á að hætta í hinu líka. Þeir hófu rekstur á smurstöðinni í Olís húsinu hinum megin við veginn 1. maí 1982. Í viðtali við Víkurfréttir fyrir fimm árum voru þeir farnir að huga að því að leggjast í helgan stein en það hefur tekið fimm ár. Þeir sögðu reyndar þá að þeir væru alveg til í að vera tuttugu árum yngri því reksturinn væri í góðum málum en væru þó til í að hleypa öðrum að. 

Sverrir tekur við rekstrinum og opnar daginn eftir hátíðisdag verkalýðsins mánudaginn 2. maí. „Við höfum verið að bæta við okkur í bílaþjónustu á síðustu árum þannig að þetta passar vel inn í þá þróun,“ segir Sverrir sem tók við bílaumboði Heklu fyrir nokkrum árum og er staðsett á Fitjum í Njarðvík. Þar hefur Sverrir rekið Nýsprautun í langan tíma. Nú taka hann og hans menn við þjónustunni í Básnum í Keflavík þar sem líklega hundruð þúsundir hjólbarða hafa rúllað um gólf og bíla.  

Björn var að skipta yfir á sumardekkin hjá Magnúsi Haraldssyni, einum af mörgum dyggum viðskiptavinum þeirra félaga.

Fjörutíu ára gömul mynd af Birni og Þórði taka við af þeim Ingvari og Guðna á smurstöðinni 1. maí 1982.