Samfylkingin
Samfylkingin

Íþróttir

Reynismenn leggja niður meistaraflokk í körfu
Reynismenn urðu deildarmeistarar annarrar deildar á síðasta tímabili, Sveinn er annar frá hægri í efri röð.
Jóhann Páll Kristbjörnsson
Jóhann Páll Kristbjörnsson skrifar
sunnudaginn 5. september 2021 kl. 12:28

Reynismenn leggja niður meistaraflokk í körfu

Sú dapurlega staða er komin upp hjá körfuknattleiksdeild Reynis í Sandgerði að allt útlit er fyrir að meistaraflokkur verði lagður niður og taki ekki þátt í Íslandsmótinu í ár.

Sveinn Hans Gíslason, sem hefur nánast staðið einsamall að baki starfs körfunnar í Sandgerði undanfarin 34 ár, segir að nú sé hann kominn á endastöð og allt útlit bendi til að hann geti ekki mannað þær stöður sem þarf að manna á heimaleikjum.

Í samtali við Víkurfréttir sagði Sveinn að staðan væri einföld: „Ég næ ekki að manna það sem þarf að gera á heimaleikjum. Þar með hefur allt sem snýr að fjármögnun setið á hakanum.
Þar sem að stutt er í fyrsta leik og þetta staðan þá ákvað ég að eftir að hafa séð um allan pakkann í tæp 34 ár að núna væri kominn tími á að stoppa að gera þetta einn.
Því miður hefur enginn boðið sig fram til að aðstoða við vinnu á leikjum og fjáröflun. Það má líka minnast á það að deildin er skuldlaus.
Þess vegna stefnir í að meistaraflokkur verði lagður niður – en ég mun samt halda áfram með níunda flokk og skoða hvort hægt verði að vera með flokk fyrir tólf ára og yngri,“ sagði Sveinn.

Viðreisn
Viðreisn

Deildarmeistarar Reynis

Reynismenn urðu deildarmeistarar í annarri deild karla á síðasta ári og ættu því að leika í fyrstu deild í vetur. Það yrði því afar sorglegt fyrir körfuknattleik í Sandgerði ef flokkurinn verður lagður niður og maður spyr sig: „Er virkilega enginn áhugi í Suðurnesjabæ á að halda úti körfuknattleiksliði í sveitarfélaginu?“