VF 1988: OLÍUMENGAÐ GRUNNVATN

Við áframhaldandi rannsóknir á því svæði sem olían fór niður, ofan við Njarðvík á dögunum, hefur komið í ljós að jarðvegurinn hélt ekki olíunni og hefur hún því komist ofan í grunnvatnið og mengað það. Hafa Njarðvíkingar þegar lokað einni borholu í öryggisskyni.

Þó yfirvöld vonist nú til að straumar liggi þannig að olían berist til sjávar, eru aðilar þó viðbúnir því versta og leggjast því allir á eitt til að bjarga vatnsbólum Njarðvíkinga og hugsanlega Keflvíkinga, að sögn Magnúsar H. Guðjónssonar, heilbrigðisfulltrúa. Þær lausnir sem menn sjá helst í stöðunni er að flytja vatnsbólin út fyrir byggðina, sem að sjálfsögðu er langtímasjónarmið.

Nú er fylgst mjög gaumgæfilega með ferli olíumengunarinnar en mjög erfitt er að gera sérgrein fyrir því hvað mengunin verði fljót að komast í borholurnar. Er talið að það geti allt eins tekið nokkur ár og þá marga tugi ára að hreinsast aftur.

VF.is birtir eldra efni af síðum Víkurfrétta sem fögnuðu nýlega 40 ára útgáfuafmæli. Meðfylgjandi grein birtist 7. janúar 1988.