Leggja mat á staðsetningar fyrir tjaldsvæði í Reykjanesbæ

Gunnari K. Ottóssyni, skipulagsfulltrúa Reykjanesbæjar, hefur verið falið að taka saman minnisblað um mögulega staðsetningu fyrir nýtt tjaldsvæði í Reykjanesbæ og leggja mat á mögulega staði.

Minnisblað verkefnastjóra ferðamála um tjaldsvæði í Reykjanesbæ, þar sem óskað er umsagnar umhverfis- og skipulagsráðs, var tekið fyrir á fundi ráðsins í síðustu viku.

„Miðflokkurinn fagnar þessum frábæru tillögum og er í raun óskiljanlegt að það skuli ekki vera nú þegar til aðstaða fyrir þennan markhóp. Það er grundvallarþjónusta að hvert bæjarfélag reki tjaldsvæði. Slíkt eflir og frjóvgar hvert samfélag, eykur þjónustu og listalíf. Það er öllum til hagsbóta að þessi hugmynd verði að veruleika fyrir næsta sumar,“ segir í bókun sem Gunnar Felix Rúnarsson lagði fram á fundinum.