Optical Studio
Optical Studio

Fréttir

Flokkun úrgangs og endurvinnsla og endurnýting munu aukast
Föstudagur 8. febrúar 2019 kl. 09:45

Flokkun úrgangs og endurvinnsla og endurnýting munu aukast

Flokkun úrgangs og endurvinnsla og endurnýting munu aukast á næstu árum en þó hefur ákvörðun um að fjölga sorpílátum við heimili á Suðurnesjum ekki verið tekin að sögn Jóns Norðfjörð, framkvæmdastjóra Kölku.

Hvers vegna fá íbúar á Suðurnesjum ekki að flokka meira og aðskilja strax sjálfir heima hjá sér pappír og plast í tvær tunnur, hvers vegna er þetta sett í sömu tunnu?

„Til skamms tíma þurftu stjórnendur Kölku að tryggja nægilegt magn úrgangs til að halda brennslustöðinni gangandi án þess að ótímabærar stöðvanir ættu sér stað og þá þurfti stöðin á öllu heimilissorpi að halda. Aukið sorpmagn hefur gefið svigrúm til að hefja flokkun úrgangs við heimili. Þegar ákvörðun um að hefja flokkun var tekin, var samþykkt að byrja með auðvelda aðferð fyrir íbúana sem flestir höfðu ekki flokkað úrgang áður. Þessi flokkunaraðferð, að setja nokkur efni saman í græna tunnu hefur reynst vel þar sem hún hefur verið tekin upp.“

Myndi það ekki spara samfélaginu ef við flokkuðum betur heima hjá okkur?

„Öll endurvinnsla og endurnýting úrgangs og annarra efna er til þess fallin að spara fjármagn.“

Hvenær ætlar Kalka að taka við og/eða biðja íbúana að flokka matarleifar eða lífrænan úrgang heima hjá sér?

„Engin ákvörðun hefur verið tekin ennþá um frekari flokkun úrgangs.“

Er stefnt að því að fjölga tunnum við heimilin svo við getum flokkað meira heima?

„Engin ákvörðun liggur fyrir um að fjölga sorpílátum við heimili á Suðurnesjum.“

Hvernig sérðu fyrir þér framtíðina Jón í þessum málum?

„Á næstu árum sé ég fyrir mér talsverðar breytingar í þessum málaflokki. Ábyrgð og skyldur sveitarfélaga eru miklar eins og lög um meðhöndlun úrgangs bera með sér. Veruleg hagræðing væri fólgin í því að samræma vinnuaðferðir við meðhöndlun úrgangs, helst um allt land. Flokkun úrgangs og endurvinnsla og endurnýting munu aukast. Verulega mun draga úr urðun og innan fárra ára verður aukin þörf fyrir stærri brennslustöð.“

Ljósmyndastofa Oddgeirs
Ljósmyndastofa Oddgeirs