RNB 17 júní
RNB 17 júní

Íþróttir

Sveindís Jane er komin til baka
Sveindís Jane skoraði þrjú mörk í fyrstu tveimur umferðum sænsku úrvalsdeildarinnar, hér fagnar hún sigurmarki sínu í leiknum gegn Djurgården. Mynd af vef Kristianstad (kdff.nu)
Jóhann Páll Kristbjörnsson
Jóhann Páll Kristbjörnsson skrifar
þriðjudaginn 1. júní 2021 kl. 08:23

Sveindís Jane er komin til baka

Keflvíkingurinn Sveindís Jane Jónsdóttir lék um síðustu helgi sinn fyrsta leik eftir meiðsli þegar hún kom inn á í leik Kristianstad  og Hammarby í sænsku úrvalsdeildinni.

Sveindís gekk til liðs við þýska stórliðið Wolfsburg á síðasta ári og er á lánssamningi hjá Kristianstad, hún byrjaði tímabilið mjög vel í Svíþjóð en meiddist illa í leik í þriðju umferð deildarinnar fyrir um mánuði síðan. Í fyrstu var talið að meiðsli hennar væru alvarleg en sem betur fer reyndust þau ekki eins slæm og útlit var fyrir.

Í samtali við Víkurfréttir sagðist Sveindís hafa mætt á sína fyrstu æfingu með liðinu síðasta miðvikudag og í framhaldinu hafi hún verið valin í hóp fyrir leikinn gegn Hammarby. Hammarby vann leikinn 3:1 og fékk Sveindís að leika síðasta hálftímann í fyrsta tapleik liðsins á tímabilinu. „Ég er að vona að ég verði í byrjunarliðinu í næsta leik,“ sagði Sveindís Jane jafnframt en Kristianstad, sem er í fjórða sæti sænsku úrvalsdeildarinnar, mætir toppliði FC Rosengård næstkomandi föstudag í áttundu umferð deildarinnar.