Sérsveitarmenn og Suðurnesjalögreglan fylltu flugstöðina

Sérsveitarmenn frá ríkislögreglustjóra og úrvalslið lögreglumanna frá Lögreglustjóranum á Suðurnesjum tóku þátt í stórri aðgerð í Flugstöð Leifs Eiríkssonar nú skömmu fyrir miðnætti.

 

Sérsveitarmennirnir og lögregluþjónarnir af Suðurnesjum skiptu tugum í brottfararsal flugstöðvarinnar er þar voru þeir til að tryggja öryggi á meðan fótboltabullur frá Úkraínu voru innritaðar í flug.

 

Eins og kunnugt er sigraði Ísland lið Úkraínu með tveimur mörkum gegn engu á Laugardalsvelli í Reykjavík í kvöld. Úkraínsku bullurnar voru m.a. teknar með grjót og eggvopn á leið á leikinn.

 

Engin áhætta var tekin í flugstöðinni í kvöld þegar fólkið fór aftur utan eftir leikinn og því var allt tiltækt lögreglulið kallað til gæslu við brottförina.

 

Myndirnar tók Hilmar Bragi þegar lögregluliðið yfirgaf flugstöðina nú á tólfta tímanum.