„Þegar maður er eini höfrungurinn í skóginum getur verið gott að hitta aðra höfrunga“
Sjálfshjálparhópar.Í Reykjanesbæ er komið af stað gott starf í þágu þeirra sem eiga við geðraskanir að stríða. Má þar helst nefna Björgina sem er athvarf fyrir alla þá sem eiga við einhverskonar geðraskanir að stríða t.d. átraskanir, þunglyndi, kvíði, ýmisskonar fælni, geðhvörf, geðklofi og fl. Björgin getur reynst vel einstaklingum sem líður illa á einhvern hátt, vantar fastan punkt í tilveruna eða eru að reyna að ná tökum á sjálfum sér og lífi sínu. Þunglyndi getur aukist við einveru og því er félagsskapurinn sem fólkið veitir hvort öðru í Björginni mikils virði. Björgin er opin frá kl. 10 - 16. Í boði er ýmis handavinna, gönguferðir, tónlist, spil, ferðir á kaffihús, listasöfn og fleira auk þess sem boðið er upp á heitan mat í hádeginu.
Geðraskanir hafa ýmis birtingarform og er mjög mismunandi hvernig þetta leggst á einstaklinga. Margir halda að þeir þurfi að hafa einhverja greiningu til að mega mæta í Björgina, en svo er að sjálfsögðu ekki. Fólk getur leitað í Björgina ef því líður illa og fengið skilning og ráðgjöf vegna sinnar vanlíðunnar.
En ekki eru allir sem hafa þörf fyrir að mæta í Björgina en finna samt fyrir þeirri þörf að hitta aðra sem eru að glíma við samskonar vandamál Til þess hafa verið stofnaðir sjálfshjálparhópar. Hugmyndafræðin að baki sjálfshjálparhópi byggir á sjálfshjálp með samhjálp. Lögð er áhersla á samkennd, virðingu, að miðla reynslu, að hlusta og að eiga góða stund saman. Hver meðlimur hópsins ber ábyrgð á því að halda hópnum gangandi og að spjara sig sjálfur. Í sjálfshjálparhópi eru allir jafnir - allir meðlimir hópsins búa yfir einhverskonar þekkingu sem nýtist við að taka á sameiginlegum viðfangsefnum. Í hópunum finnur þú tilfinningalegan stuðning, upplýsingar, ráðgjöf og vináttu. Fólk hittist á jafningjagrundvelli og allar upplýsingar sem koma fram innan hópanna eru trúnaðarmál.
Tveir sjálfshjálparhópar eru starfræktir á Suðurnesjum. Annar er fyrir notendur, þ.e. þá sem eiga við geðraskanir að stríða, hinn er fyrir aðstandendur þeirra sem eru með geðraskanir.
„Það er ekki bara hinn veiki sem þjáist, byrðin er oft mikil fyrir nánustu aðstandendur.“
Sjálf hef ég persónulega reynslu af þessum tveimur hlutverkum, þ.e. að eiga við geðröskun að stríða og að vera aðstandandi þess sem á við geðröskun að stríða. Þannig að ég get sagt af eigin reynslu hvað það getur reynst vel og verið manni dýrmætt að hafa tækifæri til að hitta annað fólk sem er í sömu stöðu og maður sjálfur. Þar fæ ég tækifæri til að hitta fólk sem deilir svipaðri lífsreynslu. Með þeim skapast oft sérstakt andrúmsloft samkenndar, skilnings og öryggis. Það að deila reynslu og vonum gerir okkur kleift að sýna gagnkvæman stuðning og gefa góðar ráðleggingar.
Á hverju fimmtudagskvöldi kl. 20 í Björginni, sem er staðsett í Sjálfsbjargarhúsinu við Fitjabraut 6 í Njarðvík, hittist hópur fólks með ýmis geðræn vandamál. Þar getur fólk hitt aðra sem eru að kljást við svipuð vandamál og deilt þannig reynslu sinni. Þar er einnig hópur aðstandenda sem hittist fyrsta þriðjudag í mánuði kl. 20. Í hópnum eru aðstandendur fólks með ýmsar geðraskanir. Þátttakendur miðla af reynslu sinni og styðja hvert annað eftir megni þó svo að reynsla og aðstæður geti verið mismunandi.
Það eru allir velkomnir að koma og kynna sér þessa hópa og er rétt að benda á að þessir hópar eru fyrir ALLA SUÐURNESJABÚA.
Fyrir tæpu ári síðan ákvað Geðhjálp í Reykjavík að færa út kvíarnar og tilnefna trúnaðarmenn víðsvegar um landið. Félagið Geðhjálp eru hagsmunasamtök þeirra sem eiga eða hafa átt við geðraskanir að etja, aðstandenda þeirra og allra þeirra er láta sig geðmálefni varða á landsvísu. Uppbygging trúnaðarmannakerfis á landsbyggðinni er hluti af landsbyggðarátaki Geðhjálpar; „Rjúfum einangrun geðsjúkra á landsbyggðinni“. Eitt af hlutverkum trúnaðarmanna er að vera í tengslum við þá starfandi sjálfshjálparhópa sem eru í þeirra landshluta.
Að lokum vil ég eindregið hvetja alla til að kynna sér það frábæra starf sem fer fram í Björginni svo og að mæta á fund hjá sjálfshjálparhópunum.
Pálína Hildur Sigurðardóttir
Trúnaðarmaður Geðhjálpar á Suðurnesjum
[email protected]
