Reykjanes Optikk
Reykjanes Optikk

Íþróttir

Einum færri í 80 mínútur
Adam Árni Róbertsson kom Keflavík yfir á 8. mínútu. Mynd úr safni Víkurfrétta
Jóhann Páll Kristbjörnsson
Jóhann Páll Kristbjörnsson skrifar
mánudaginn 25. júlí 2022 kl. 08:42

Einum færri í 80 mínútur

Keflavík náði snemma forystu gegn KA þegar liðin mættust í gær í Bestu deild karla í knattspyrnu en Keflavík missti mann af velli á 11. mínútu þegar Sindri Kristinn Ólafsson, markvörður þeirra, braut á sóknarmanni KA rétt utan teigs og var vikið að velli. Keflvíkingar lögðu allt í leikinn og börðust fyrir að halda fengnum hlut en gestunum tókst að landa sigri með tveimur mörkum í uppbótartíma. Þetta er annar leikurinn í röð sem Keflavík tapar í uppbótartíma.

Keflavík - KA 1:3

Það var ekki langt liðið á leikinn þegar Keflavík komst yfir með marki Adams Árna Róbertssonar (8') eftir sendingu Sindra Þórs Guðmundssonar en skömmu síðar sótti KA og Sindri Kristinn mætti sóknarmanni sem var að sleppa í gegn og felldi rétt við vítateiginn (12'). Sindri uppskar rautt spjald fyrir og því léku Keflvíkingar einum færri í nærri áttatíu mínútur.

Sindri Kristinn Ólafsson braut af sér á 12. mínútu og var vikið af velli í kjölfarið – manni færri sýndu Keflvíkingar mikla baráttu en að lokum kostaði það of mikla orku.

Að vera manni færri þýddi aukið framlag frá öðrum leikmönnum og þeir lögðu sig alla í leikinn. Einum fleiri sótti KA en Keflvíkingar vörðust vel og héldu forystu allt þar til á 75. mínútu, þá brast loks varnarmúrinn og KA tókst að jafna.

Það var komið fram í uppbótartíma þegar Keflavík fékk hornspyrnu og freistuðu þess að stela sigrinum með því að setja flesta fram í hornið. KA náði hins vegar skyndisókn og leikmenn Keflavíkur voru einfaldlega orðnir of útkeyrðir til að ná að komast fyrir sóknina. Leikmaður KA skoraði sigurmarkið framhjá Rúnari Gissurarsyni (90'+2) sem hafði leyst Sindra Kristinn af hólmi og varlð vel í leiknum, hann gat lítið gert við markinu enda vörnin fámenn. KA innsiglaði sigurinn með öðru marki stuttu síðar (90'+4) og við það sat, lokatölur 1:3.

Góð barátta og Keflavík heldur sjötta sæti í deildinni en er jafn KR að stigum sem á leik í kvöld gegn Val.