Hérastubbur bakari í Grindavík lokar

„Það er erfitt að reka bakarí ef ekkert fólk er í bænum, ég neyðist því til að loka en vonandi ekki varanlega,“ segir Hérastubbur bakari, Sigurður Enoksson en hann hefur barist baki brotnu í allan vetur að halda bakaríinu sínu opnu en hefur nú kastað handklæðinu inn í hringinn.

Blaðamaður tók hús á Sigga fyrir ekki svo löngu og þá var baráttuhugur í honum en þó viðurkenndi hann þá að þrekið væri að minnka.

„Við erum búin að opna nokkrum sinnum í vetur en jafnharðan slegin niður aftur. Við erum búin að hafa opið núna í einhverjar vikur en það er enginn í bænum, það eru í raun yfirvöld sem eru að ýta okkur út í þessa ákvörðun. Í stað þess að spara líklega um 100 milljónir á mánuði með því að hætta með þessa tilgangslausu lokunarpósta og opna bæinn, er mér og öðrum atvinnurekendum í raun bara ýtt út í svona ömurlega ákvörðun. Ég bind vonir við nýju framkvæmdanefndina sem tekur til starfa 1. júní og það er ljóst í mínum huga að ef að þessu verður ekki breytt hið snarasta, mun Grindavík halda áfram að blæða og við vitum hvað gerist ef blæðing er ekki stöðvuð,“ sagði Siggi.