Sameiginlegur framboðsfundur: Rétt skal vera rétt

Eins og fram hefur komið mun framboðsfundur allra framboða í Reykjanesbæ fara fram næstkomandi fimmtudag 16. maí kl. 20.00 í Stapa þar sem öllum listum er fram bjóða í Reykjanesbæ er boðið að taka þátt.Sjálfstæðisflokkurinn ákvað að senda frá sér fréttatilkynningu um að Framsókn og Samfylkingin hafi hafnað þátttöku í slíkum fundi, í stuttu máli er þetta ekki rétt.
Samfylkining í Reykjanesbæ hafði frumkvæði að því að boða til fundar vegna skipulagningar sameiginlegs framboðsfundar.
Niðurstaða þess fundar var að Framsóknarflokkurinn skyldi leggja til tillögu um fundartíma og hvernig form yrði á fundinum. Eftirfarandi er tillagan orðrétt.

„Sælir félagar

Við Framsóknarmenn leggjum til að við höfum þetta fimmtudagskvöld í næstu viku frá kl. 20.00-22.00

Hver flokkur fær 10 mín. í framsögu.

Í kjölfarið verði opnað fyrir spurningar úr sal. Hver flokkur hafi einn mann til að "standa" fyrir svörum í einu. Leyfilegt er að skipta mönnum út ef mönnum sýnist.

Við teljum að þetta sé langbesta fyrirkomulagið og umræðurnar verði mun beitari og hnitmiðaðari með þessum hætti og þ.a.l. meiri skemmtun fyrir fólkið í salnum.

Hvað segja menn um þetta ???

Ég legg einnig til að við reynum að fá einhvern landsþekktan fréttahauk til að stjórna umræðum, þannig er hugsanlegt að við náum meiri aðsókn á fundinn.

Kveðja

Eysteinn Jónsson

864-0807“

Í stuttu máli samþykkti Samfylkining tillögu Framsóknarflokksins með smá breytingartillögu um að hver flokkur fengi 3 mínútna lokaorð.

Sjálfstæðismenn hins vegar svöruðu tillögu Framsóknarflokksins afar einkennilega og  komu með afar einkennilega tillögu sem vart er hægt að túlka sem tillögu heldur einhverskonar tilskipun til hinna framboðanna um það hvernig fundurinn yrði. Eftirfarandi er tilskipun Sjálfstæðisflokksins orðrétt.

Sælir,

Við hefðum kosið að hafa fundinn fyrr eins og ég minntist á í gær. 16. maí er hins vegar ágætis dagur og líklegt að hægt sé að mynda stemmningu.

Formið yrði þá 10 mín. framsaga sem hægt væri að skipta niður á fleiri en einn frambjóðanda ef mönnum sýnist svo. Í lokin yrðu svo ca. 3 mínútna lokaorð á hvern lista.

Varðandi panelinn, þá yrðu 4 frambjóðendur frá hverjum lista til svara. Ef einhver vill hafa færri, þá er hverjum lista það í sjálfsvald sett.

Í framsögunni og lokaorðum standa menn, en í panelnum sitja frambjóðendur og svara fyrirspurnum utan úr sal.

Fjalar yrði vafalaust góður fundarstjóri og leggjum við til að hann verði fenginn til starfans ef hann er á annað borð fáanlegur.


Kostnaði yrði dreift jafnt á flokkana. Rætt við Harald varðandi kaffiveitingar o.þ.h. og hann fenginn til að gefa okkur verð á þetta.

kv.

Jón Einars. “ 

Það næsta sem heyrist frá Sjálfstæðisflokknum er að þeir hafna hugmyndum Framsóknarmanna formlega með bréfi dags. 8. maí. 2002 kl. 09.32.

Eftirfarandi er formlegt svar Sjálfstæðisflokksins.

„Sælir,

Því miður er ekki hægt að fallast á þá hugmynd að hafa aðeins einn frambjóðanda af 22 í pontu þessa tæpu tvo tíma. Ef sú hugmynd sem við lögðum fram um að a.m.k. þrír fulltrúar hvers framboðs stæðu fyrir svörum er ekki inni í myndinni, þá teljum við grundvöllinn fyrir svona fundi brostinn og höfum ekki áhuga að óbreyttu.



Með vinsemd og virðingu

Jón Einars.“

Í kjölfarið á þessu kom Samfylkingin með undirritað samkomulag, sem þó var ekki alveg í samræmi við tillögu Framsóknarflokksins um fundartíma og fundarform. Framsóknarflokkurinn samþykkti samkomulagið sem Samfylkingin kom með en Sjálfstæðisflokkurinn hafnaði því skrfilega og hélt fast í tilskipun sína um það hvernig formið á fundinum yrði.

Það næsta sem gerist er að Framsóknarflokkurinn og Samfylkiningin höfnuðu með bréfi þann 10. maí til Sjálfstæðisflokksins um fundarformið en bauð jafnframt Sjálfstæðisflokknum að skrifa undir samkomulagið og jafnframt að taka þátt í fundinum sem er stendur reyndar enn.

Það næsta sem Framsóknarflokkurinn fréttir er að Sjálfstæðismenn eru búnir að senda staðrarblöðunum fréttatilkynningu um að Framsókn og Samfylking hafi hafnað  þátttöku í sameiginlegum framboðsfundi, sem er algerlega rangt enda mun fundurinn fara fram með eða án Sjálfstæðisflokksins.

Hið rétta er að Sjalfstæðisflokkurinn hafnar fyrst hugmyndum Framsóknarflokksins með bréfi 8. maí sem Samfylkingin var búin að samþykkja. Þann 10. maí dags hafnar síðan Sjálfstæðisflokkur hugmyndum Samfylkingar sem Framsóknarflokkurinn var einnig búinn að samþykkja.


Eysteinn Jónsson
kosningastjóri Framsóknarflokksins.