Jólahugvekja til Birgis Þórarinssonar varaoddvita

Í síðasta tölublaði Víkurfrétta skrifaði Birgir Þórarinsson grein sem hann nefndi „Sveitarstjórapyngjan“ og er þar að gera athugasemdir við skrif mín og bókanir um launamál sveitarstjóra. Mál þetta er greinilega mjög viðkvæmt. Ég er hrædd um að varaoddvitinn hafi hlaupið á sig í þessum skrifum sínum. Hann segir að ég setji málið þannig upp að „nú verði hvert mannsbarn í hreppnum að safna mánaðarlega í pyngju sveitarstjóra“ og að í fyrstu hafi upphæðin verið um þúsund krónur á mann svo hafi ég farið að reikna aftur og sé núna komin í tæpar þúsund krónur.Og svo fræðir hann lesendur Víkurfrétta, að ekki þurfi lengur að ganga í hús og safna fyrir launum sveitarstjóra heldur sé tæknin orðin nútímalegri. Þessi sýn hans er í raun svo barnaleg. Í sambandi við þessi launamál vil ég benda á það að núverandi oddviti samdi við sveitarstjóra á sínum tíma, þá fékk sveitarstjóri reyndar 92% (óstaðfestar heimildir) af þingfararkaupi en fær 100% í dag ásamt óunninni yfirvinnu, bílastyrk og fl. Einnig kemur fram í ráðningarsamningi sveitarstjóra, að hún skuli leitast við að hafa viðveru á opnunartíma. Sem sveitarstjóri og félagsmálastjóri hefur hún enga fasta viðtalstíma. Ég get aftur á móti upplýst varaoddvitann um það að á miðju síðasta kjörtímabili varð mikil hækkun á þingfarakaupi 30-40% og það eitt og sér hefði verið næg ástæða til að endurskoða ráðningarsamning sveitarstjóra. En það er rétt að segja varaoddvitanum það á „mannamáli“ svo notuð séu hans orð að miðað við stærð og umfang, að ég tali nú ekki um fjárhagsstöðu sveitarfélagsins þá erum við að borga of há laun. Við þurfum ekki að vera með neina „gulrót“ eins og kannski þurfti fyrir 12 árum síðan. Einnig vil ég benda þér á nýlega könnun á kjörum framkvæmdastjóra sveitarfélaga, sem Samband Íslenskra Sveitarfélaga birti í ágúst 2002. Þetta er alltaf spurning um forgangsröðun og í hvað við viljum setja fjármuni hreppsins. Þið veljið að halda uppi H-launa stefnu en það á reyndar bara við um sveitarstjórann og kannski einhverja „gæðinga“ en ekki um hinn almenna launamann hreppsins. En aftur að kostnaði við laun sveitarstjóranns því eins og þú segir réttilega þá eiga íbúarnir rétt á því að vita í hvað skattarnir þeirra fara, setjum dæmið upp hreint og klárt eins og það kemur fram í fjárhagsáætlun hreppsins sem er núna í vinnslu. Þar kemur fram að laun sveitarstjóra á árinu 2003 verði kr. 7,372.147.- bifreiðarstyrkur kr. 749.000.- einnig fær hún greiddan símakostnað og þá á eftir að reikna launatengdan kostnað (sem er ekki inni í þessum tölum) sem og nefndarlaun. Sveitarstjóri á seturétt í nánast öllum nefndum hreppsins og fær greitt fyrir það, einnig fær hún greitt fyrir hreppsnefndarfundi og fyrir þetta þurfa íbúar í Vatnsleysustrandarhreppi að greiða. Ég get upplýst þig um það að 614 þúsund er ekki sú tala sem sveitarstjóri er að hafa fyrir starf sitt hjá Vatnsleysustrandarhreppi. Í sambandi við setu sveitarstjóra í öllum nefndum, þá er það fáheyrt að sveitarstjórum séu veitt slík völd, þó þetta sé löglegt. Einnig segir varaoddvitinn að það sé ekki hægt að lækka launin hennar, það væri rakinn dónaskapur, en það er greinilegt að það á ekki við um aðra starfsmenn hreppsins eins og nýlegt dæmi sannar.Varaoddvitinn talar svo um að sveitarstjórinn gegni stöðu félagsmálastjóra og því séu launin hennar ekki of há og miðar við að algeng laun félagsmálastjóra séu um 350.000.- á mánuði. Í þeim tilfellum er um menntaðan félagsráðgjafa eða sálfræðing að ræða og efast ég ekki um að þeir kunni lágmarks kurteisi og mannleg samskipti, en þær kröfur eru greinilega ekki gerðar til félagsmálastjóra Vatnsleysustrandarhrepps. Ég vil meina að miðað við stærð og umfang sveitarfélagsins þá væri raunhæft að ráða félagsmálastjóra í 20% starf eða sem svarar einum virkum degi í viku, með fasta viðtalstíma.Varaoddvitinn minnir á að sveitarstjórinn hafi unnið fyrir laununum sínum og dásamar verk hennar í hástert en gleymir að segja frá því að sama tíma og hreppurinn samdi við ÍAV um framkvæmdir í hreppnum án útboðs og Sparisjóðurinn lánaði til verksins, þá sat sami sveitarstjóri í stjórn sparisjóðsins. Nú tala menn ekki um hagsmunaárekstra eða hvað? Hvar er allt viðskiptasiðferðið núna? Svo talar varaoddvitinn um hvað allir hafi nú grætt mikið á störfum sveitarstjóra, já það væri fróðlegt að vita hver græddi? Og á hverju? Því varla getur þú þakkað sveitarstjóra Vatnsleysustrandarhrepps hækkun á fasteignaverði sem hefur orðið á landinu öllu en mest í sveitarfélögum næst höfuðborginni. Ég vil benda varaoddvitanum á það að sveitarstjóri á að hafa framkvæmt það sem meirihluti hreppsnefndar samþykkti að gera. En þú ert að segja okkur það að sveitarstjórinn hafi verið einráður í hreppnum, en reyndar nefnir þú að fyrrverandi oddviti hafi stutt sveitarstjóra, ja hérna, hver var nú yfirmaður hvers og hver að stjórna hverjum? Og hver er að gera lítið úr hverjum? En það virðist vera einhver lenska hjá ykkur að þakka sveitarstjóra það sem vel tókst, en kenna fyrri oddvita um það sem miður fór. Þið þurfið að gera ykkur grein fyrir því að málið snýst um að gera betur og að skoða það sem miður hefur farið svo við getur lært af mistökunum en ekki að berja hausnum við steininn. Vatnsleysustrandarhreppur fékk ekki verðlaun fyrir markaðsátakið, heldur fékk auglýsingastofan verðlaun fyrir þessa auglýsingagerð. Þessi dýrkun varaoddvitans á sveitarstjóra er með öllu óskiljanleg svo og þessi málflutningur hans.Við vitum það vel að það er ekki alltaf hægt að gera öllum til hæfis og að fólk hefur misjafnar áherslur. Sumir eru neikvæðir og velja að sjá alltaf eitthvað neikvætt út úr öllu, t.d. eins og sjá mátti á nýlegri grein eftir varaoddvitann þar sem hann fór geyst um mynd sem tekin var í Bláa Lóninu af ungum Suðurnesjapiltum, en sem betur fer eru fleiri jákvæðir og velja að horfa á broslegu hliðarnar. Eftir að ég fór að kynna mér hreppsmálin hefur ýmislegt komið í ljós sem mér finnst að betur ætti að fara. Vinnubrögð þar eru óvönduð að mínu mati og lítill metnaður í að gera vel eða kunnátta ekki meiri en sem sýndi sig í nýlegri starfsmannastefnu og einnig þegar hreppnefndarmenn fengu send gögn til skoðunar í sambandi við fjárhagsáætlunargerð sem nýlega var í vinnslu. Hvar er nýtískulega tæknin núna sem varaoddvitinn hreykti sér hátt af? Ég vil benda varaoddvitanum á það að íbúum Vatnsleysustrandarhrepps hefur fækkað á síðasta ári um þrjá (tölur frá sept. sl.) en það eru kannski staðreyndir sem honum þóknast ekki að horfa á? Varaoddvitinn talar um að tekjur sveitarfélagsins hafi aukist um 60% á þremur árum en samkvæmt ársreikningum áranna 1999 og 2001, þá hafa tekjur ekki aukist nema um tæp 37%, þú nefnir það ekki einu orði hvað skuldir hafi aukist, nei bara talað um það sem kemur best út í hvert eitt sinn. En til að upplýsa þig og aðra íbúa hreppsins um það, þá hafa skuldir aukist um 150% á sama tímabili. Fjölgun íbúa er 9% á sama tímabili en ekki 19% eins og þú heldur fram. Peningaleg staða versnaði um 53% og skuldir pr. íbúa hafa aukist um 117% á sama tíma. Svo að endingu eru það vinnubrögð meirihluta hreppsnefndar, þau einkennast af yfirgengilegum hroka og dónaskap og lítilsvirðingu gagnvart minnihlutanum, en það er efni í annað bréf. Það er full ástæða til að gera fólki grein fyrir vinnubrögðum og framkomu ykkar.

Með guðs friði og bestu jóla og nýársóskum til þín og þinna.

Halldóra M. Baldursdóttir
Fulltrúi V-lista, í minnuhluta hreppsnefndar Vatnsleysustrandarhrepps


Ljósmynd: ©Mats Wibe Lund.