Biðin eftir skýrslunni lengist: „Við erum orðin helvíti góð í að bíða“

24. fundi Járngerðar, sem fram fór á Teams-fjarfundaforritinu á mánudag, kom fram að sú skýrsla sem margir Grindvíkingar bíða eftir með eftirvæntingu verður ekki tilbúin fyrir 31. mars eins og vonast hafði verið til.

Á fundinum var farið yfir mikilvægi þess að raddir barna og ungmenna heyrist og rætt um þá erfiðu samkeppni sem ríkir um rannsóknarstyrki.

Mikið var rætt um dagsetninguna 31. mars, en hún hefur oft verið nefnd í tengslum við upplýsingagjöf um framtíð Grindavíkur. Á fundinum kom fram að skýrslan væri ekki væntanleg strax og líklega ekki fyrr en eftir páska.

„Við bíðum bara lengur. Við erum vön því og orðin helvíti góð í því,“ sagði einn fundarmanna um þessa áframhaldandi óvissu.

Samstarf við „sjúklinginn“ lykilatriði

Sólveig Þorvaldsdóttir, doktor í jarðskjálftaverkfræði, greindi frá því að verkefni sem hún hafði unnið að fékk ekki styrk frá Rannís að svo stöddu, þrátt fyrir góðar umsagnir. Hún lagði ríka áherslu á að í allri vinnu við áhættumat og náttúruhamfarir þyrfti að vera stöðugt samtal á milli vísindamanna og íbúa.

„Þetta verður að vera fram og til baka. Það er ekki hægt að sitja bara á skrifstofu og halda að maður geti búið til eitthvað fullkomið,“ sagði Sólveig og líkti vinnunni við samtal læknis og sjúklings: „Þú verður að tala við sjúklinginn og spyrja: Er þetta vont ef ég ýti hér?“ Fundarmenn voru sammála um að þörf væri á „lifandi skjali“ fremur en kyrrstæðu mati.

Stolt af ungmennum Grindavíkur

Sérstök ánægja var lýst yfir framlagi Grindvíkinga á nýafstaðinni ráðstefnu í Háskóla Íslands . Þar sögðu fulltrúar Grindavíkur frá ungmennaþinginu og mikilvægi þess að gefa börnum rödd í því ástandi sem nú ríkir.

Fundarmenn ræddu um hversu mikilvægt það væri fyrir börnin að fá svör við grundvallarspurningum. Einn nefndi spurningu sonar síns sem dæmi: „Hvenær segir maðurinn hvort það megi flytja aftur í Grindavík eða ekki?“ Þetta undirstrikar þörfina á að finna andlit fyrir þær ákvarðanir sem teknar eru og tryggja að Grindvíkingar viti hver það er sem stýrir næstu skrefum.

Næsti fundur eftir páska

Fundinum lauk á jákvæðum nótum þar sem fólk hvatti hvert annað til að mæta í bíó og á körfuboltaleiki sem framundan eru. Næsti fundur hópsins er fyrirhugaður 13. apríl og er búist við að hann verði langur og strangur þegar skýrslan verður vonandi loks komin fram.

„Gleðilega páska og áfram Grindavík!“ voru lokaorð fundarins.