Gosið á lokastigi ef ekki lokið

Lítil sem engin virkni hefur sést í gígnum við Sundhnúk frá því um kl. 4:00 í nótt. Þorvaldur Þórðarson, prófessor í eldfjallafræði, segir á síðu Rannsóknareiningar í eldfjallafræði og náttúruvá hjá Háskóla Íslands að líklegt er að gosið sé á lokastigi ef ekki lokið.

Sé gosinu lokið auðveldar það mönnum vinnu við varnargarða í Svartsengi sem hraun tók að renna yfir í gærkvöldi. Hraun rennur enn yfir garðinn.

Landris er undir Svartsengi. Frá síðustu goslokum liðu tuttugu sólarhringar þar til gaus að nýju, en þá hafði staðið yfir landris samhliða gosinu í meira en mánuð.