Njarðvíkurskóli uppeldisstöð skólastjórnenda

„Njarðvíkurskóli er uppeldisstöð því ef þau hafa ekki kennt við skólann þá hafa þau gengið í hann,“ segir Ásgerður Þorgeirsdóttir, skólastjóri Njarðvíkurskóla um þá skemmtilegu staðreynd að allir núverandi skólastjórar grunnskólanna í Reykjanesbæ hafa einhver tengsl við Njarðvíkurskóla. Í skólanum starfa að sögn Ásgerðar einnig mjög margir sem áður voru nemendur þar. „Þá hlýtur þeim að hafa liðið vel í skólanum,“ segir hún og hlær. Olga Björt hitti skólastjórnendur úr Reykjanesbæ og fræðslustjóra bæjarins og gróf upp ýmsar skemmtilegar staðreyndir.

Anna Sigríður Guðmundsdóttir, skólastjóri Háaleitisskóla. Gekk í Njarðvíkurskóla.
Ásgerður Þorgeirsdóttir, skólastjóri Njarðvíkurskóla. Hefur einungis kennt við Njarðvíkurskóla frá því hún útskrifaðist fyrir 31 ári.
Bryndís B. Guðmundsdóttir, skólastjóri Myllubakkaskóla. Um tíma í starfsnámi við Njarðvíkurskóla.
Eðvarð Þór Eðvarðsson, skólastjóri Holtaskóla. Stundaði nám og kenndi við Njarðvíkurskóla.
Gylfi Jón Gylfason, fræðslustjóri Reykjanesbæjar. Um tíma í starfsnámi og sinnti forfallakennslu við Njarðvíkurskóla.
Sigurbjörg Róbertsdóttir, skólastjóri Akurskóla. Kenndi og gekk í Njarðvíkurskóla.
Sóley Halla Þórhallsdóttir, skólastjóri Heiðarskóla. Kenndi um tíma í Njarðvíkurskóla.

Elsti grunnskólinn
Ásgerður segir Njarðvíkurskóla einnig njóta dálítillar sérstöðu vegna þess að grenndarsamfélagið er svo nátengt skólunum. „Njarðvíkurskóli er elsti grunnskólinn í Reykjanesbæ, 72 ára gamall, og fólk hefur svo miklar taugar til skólans. Það er viss eining í skólanum sem tengist út í samfélagið.“
Í Keflavík skiptust skólarnir niður eftir deildum og tengdust nemendur því ekki þeim í eins langan tíma í einu. „Það er enginn Keflavíkurskóli og það getur vel verið að Keflvíkingum finnist erfitt að fara í Njarðvíkurskóla. Einhvern tímann var stungið upp á því að breyta nafni skólans en ég sagði það ekki koma til greina,“ segir Ásgerður með áherslu.

Fjörugir nemendur að leik við skólann.

Lengsti starfsaldur fjögur ár
Sjálf er Ásgerður með lengsta starfsaldur grunnskólastjórnenda í Reykjanesbæ, en hún stýrir skólanum fjórða skólaárið. Einnig er hún fimmti skólastjórinn í langri sögu skólans. Mikil nýliðun og endurnýjun hefur átt sér stað í grunnskólum í Reykjanesbæ. Eðvarð Þór er á sínu fyrsta skólaári í Holtaskóla, einnig Bryndís í Myllubakkaskóla, Sigurbjörg hefur setið í þrjú ár í Akurskóla, Sóley í eitt ár í Heiðarskóla og Anna Sigríður einnig í Háaleitisskóla. „Stundum er verið að gantast í mér og kalla mig reynsluboltann,“ segir Ásgerður kímin.

Ásgerður, Sigubjörg og Sóley Halla eru saman í vinkonu-gönguhópi sem spjallar oftast um skólamál.

Konur í meirihluta
Konur eru í meirihluta skólastjórnenda og aðstoðarskólastjórnenda á Suðurnesjum. „Á sínum tíma þegar Sigríður Ingibjörnsdóttir var yfirkennari í Njarðvíkurskóla, var hún eini kvenstjórnandinn á Suðurnesjum, á seinni hluta síðustu aldar. Þá voru bara Holtaskóli, Njarðvíkurskóli og Myllubakkaskóli á svæðinu sem nú er Reykjanesbær. Keflavíkurskólarnir skiptu á milli sín yngri deild og unglingadeild. Skólunum hefur fjölgað um þrjá síðan þá. Ásgerður segir að ástæða þess að fleiri konur eru skólastjórar núna sé kannski að fleiri konur eru í kennarastéttinni. „Einnig gæti það verið vegna álags í starfinu því það hefur breyst. Í gamla daga sátu skólastjórar í marga áratugi en ég held að fólk sjái sig ekki svo lengi í svona starfi í dag.“

Bryndís og Sigurbjörg eru í sama saumaklúbbi.

Voru einfaldlega hæfastar
Gylfi Jón Gylfason, fræðslustjóri Reykjanesbæjar, er sonur fyrrum skólastjóra Njarðvíkurskóla, Gylfa Guðmundssonar. Gylfi Jón tók hluta af starfsnámi í skólanum og kenndi þar í forföllum. „Sem sonur fyrrum skólastjóra verð ég að segja að það er áratuga hefð fyrir því að stjórnendur í Njarðvík sáu kröftugir. Það væri skemmtilegra ef þetta væri öðruvísi en þessar konur sem eru stjórnendur núna voru einfaldlega hæfastar umsækjenda þegar störfin voru auglýst. Það er reyndar skemmtileg tilviljum hversu vel þær þekkjast allar, eru í sömu saumaklúbbum, vinahópum og slíku.“

„Þær þola ekki bið“
Gylfi Jón segir að samkvæmt Skólavoginni séu kennarar í Reykjanesbæ mjög ánægðir með sína stjórnendur og ánægðari með sína stjórnendur en gengur og gerist annars staðar. „Þeir upplifa sig einnig fá meiri stuðning frá sínum stjórnendum. Ég hef það bara eftir ráðningaskrifstofunni, sem kom að ráðningu skólastjórnendanna, að skólastjórnendahópurinn í Reykjanesbæ sé með þeim sterkari á landinu.“ Það að konur eru í meirihuta segir Gylfi að endurspegli á einhvern hátt kynjahlutfallið í stéttinni en svo séu konur bara reiðubúnari að axla þessa ábyrgð. „Þetta eru flottar konur sem þora að stíga fram og koma hugmyndum sínum í framkvæmd. Það eiga þær allar sameiginlegt að vera kappsamar og þær þola ekki bið. Það er ýtt við mér að svara erindum ef það eru liðnir klukkutímar eftir að bréfið var sent. Ég er bara umkringdur konum sem segja mér til. Það er ekki bara heima hjá mér,“ segir Gylfi Jón og hlær.

Heimaræktaðir skólastjórnendur
Af hópnum sem blaðamaður Víkurfrétta hitti á Kaffitári nýverið hefur enginn utanaðkomandi verið ráðinn sem skólastjóri. Öll eru þau heimaræktaðir skólastjórnendur sem búa flest í hverfum skólanna sem þau stjórna og eiga öll eða hafa átt börn í grunnskólunum. Þá hafa þau öll tekið skref upp metorðastigann, verið t.d. deildarstjórar og/eða aðstoðarskólastjórar áður. „Ástríðan kemur vegna þess að við erum skólafólk í heimabyggð og höfum séð og upplifað ýmsar breytingar,“ segir Ásgerður. Gylfi Jón bætir inn í umræðuna að fyrsta embættisverk sitt sem fræðslustjóri hafi verið að skrifa undir þegar Ásgerður varð skólastjóri.

Eins og aðgangsharður bekkur
Skólastjórarnir eru sammála um að þau stefni öll að sameiginlegu markmiði, sem er fyrst og fremst velferð og fræðsla til barnanna. Sem hópur standa þau þétt saman og þekkjast vel. „Ég er hringjandi í ykkur öll og fæ mikinn stuðning í mínum fyrstu skrefum sem skólastjóri,“ segir Bryndís. Sóley Halla segir að sambandið sé mjög gott á milli allra í hópnum og Bryndís bætir við að mjög erfitt sé fyrir Gylfa Jón að halda skólastjórnarfundi. „Hann þarf að sýna ákveðni. Við erum dálítið eins og aðgangsharður bekkur.“ Gylfi Jón svarar um hæl: „Mér fellur vel að vera umkringdur fólki sem þolir ekki að bíða.“ Anna Sigríður bætir þá við að öll hafi þau miklar skoðanir á skólamálum og Sigurbjörg segir hlæjandi að lítið annað en skólamál séu rædd í hópum sem hún tengist, hvort sem það er saumaklúbbur eða gönguhópur. Til gamans má geta að Anna Sigríður er fyrsti ófríski starfandi skólastjóri Reykjanesbæ, en hún er komin fimm mánuði á leið.

Njarðvíkurskóli og umhverfi hans.

Horfa reglulega inn á við
Dálítil umræða verður í kjölfarið um störf skólastjórnenda og kennara. Gylfi Jón segir að skólastjórnandi þurfi í senn að vera með bein í nefinu en samt mjúkur sáttasemjari. Hann rifjar upp endurfund með fyrrum nemendum sem haft höfðu samband við þrjá af sínum uppáhaldskennurum og sögðu við þá að þeir hefðu alltaf gefið sér tíma til að tala við þau. „Kjarninn í kennslu er þessi. Að kenna og gefa þessa nærveru,“ segir Gylfi Jón. Ásgerður bætir við að kennsla sé ástríðustarf. „Það þarf reglulega að horfa inn á við og spyrja sig af hverju maður er í þessu starfi. Það þarf að leggja meira en 100% á sig, þá næst árangur. Ef þessi ástríða er ekki til staðar þá þarf að finna annan vettvang,“ segir hún. Sóley Halla bætir við að hún skilji ekki hvers vegna fólk er í þessu starfi ef ástríðan er ekki til staðar. Ekki séu það launin sem sóst er eftir.  

Kennarar bjarga framtíð margra
Gylfi Jón segir að svo séu sumir kennarar þannig að þegar sett eru til þeirra börn með gífurleg vandamál, þá er eins og að vandamálin hverfi. „Það virðist ekkert að þeim á meðan þau eru hjá slíkum kennara. Síðan verður að skipta út kennurum og vandamálin blossa upp aftur. í Danmörku eru þessi börn kölluð fíflabörnin [út frá blóminu fífli]. Börn sem ná sér á strik þrátt fyrir herfilegar uppeldisaðstæður. „Ég á nokkra svona fífla hérna á Suðunesjum sem hafa klárað nám vegna þess að það voru kennarar sem höfðu trú á þeim. Ég heyrði aftur og aftur  nöfn sömu kennara. Fólk sem bjargaði mannslífum og framtíð fólks,“ segir Gylfi Jón. Ásgerður bætir við: „Það er þessi trú sem skiptir máli. Að hafa trú á sjálfum sér og börnunum.“ Hópurinn tekur undir það.
 

VF/Olga Björt