Stórsigur Keflavíkur

Karlalið Keflavíkur vann sigur á Stjörnunni í miklum markaleik í Deildarbikarnum í gær. Lokastaðan var 6-3 þar sem Hörður Sveinsson og Guðmundur Steinarsson skoruðu tvö mörk hvor og Scott Ramsey og Guðjón Antoníusson eitt mark hvor.

Keflvíkingar eru því enn taplausir í Deildarbikarnum, en spila næst á laugardaginn gegn FH áður en þeir halda í æfingaferð til Danmerkur.

Þá gerðu Keflavík og Fjölnir 4-4 jafntefli í Deildarbikar kvenna í gær. Samkvæmt heimasíðu félagsins voru stelpurnar að spila vel í leiknum og voru óheppnar að hafa ekki sigur úr leiknum.  Það voru þær Ágústa Jóna Heiðdal, Bergey Erna Sigurðardóttir, Inga Lilja Eiríksdóttir og Ólöf Helga Pálsdóttir sem skoruðu mörk Keflavíkur.