Njarðvíkingar semja við 5 leikmenn
Leika fyrsta leik sinn í Lengjubikarnum á fimmtudag í Reykjaneshöllinni.
Knattspyrnudeild Njarðvíkur hefur samið við 5 leikmenn fyrir komandi tímabil en Njarðvíkingar mæta liði KFR í fyrsta leik sínum í Lengjubikarnum nk. fimmtudag í Reykjaneshöllinni.
Róbert Örn Ólafsson kemur til liðsins frá Víði í Garði og Óðinn Jóhannsson frá Keflavík. Róbert á að baki 71 leik með meistaraflokki Víðis og hefur skorað í þeim 16 mörk en Óðinn spilaði með 2. flokki Keflavíkur á síðasta tímabili. Þess má til gamans geta að Ómar Jóhannsson, aðstoðarþjálfari liðsins, er bróðir Óðins.
Þá hafa Njarðvíkingar samið við þrjá leikmenn sem léku með liðinu sem lánsmenn í fyrrasumar, þá Bergþór Smárason, Magnús Þór Magnússon og Viktor Hafsteinsson, en allir komu þeir á láni frá Keflavík.
