Njarðvík enn á botninum eftir fjórða tapið í röð

Enn syrtir í álinn fyrir Njarðvíkinga í 1. deild karla í knattspyrnu, en þeir töpuðu fyrir Þór á Akureyri í kvöld, 3-1, og sitja sem fyrr á botni deildarinnar.

 

Aron Smárason kom UMFN yfir með marki úr vítaspyrnu á 25. mínútu, en áður en fyrri hálfleikur var liðinn hafði einum leikmanni Þórs verið vikið af leikvelli.

 

Í seinni hálfleik jafnaði Aleksandar Linta leikinn, einnig úr víti, á 68. mínútu og Ármann Pétur Ævarsson kom Þórsurum yfir á 80. mínútu. Þá var Njarðvíkingnum Alexander Magnússyni vikið af velli á sama tíma.

 

Ármann kláraði svo leikinn á lokamínútu leiksins með sínu öðru marki og þriðja marki Þórsara þannig að fjórða deildartap Njarðvíkur er staðreynd og þeir hafa ekki unnið leik í rúman mánuð, eða frá heimasigri gegn KA þann 6. júní.

 

Þeir eru neðstir í deildinni, eins og áður sagði, með 6 stig, líkt og KS/Leiftur.