Magnús gladdi liðsfélagana með pizzaveislu
Það eru ýmsar agareglur sem knattspyrnulið setja sér. Liðsmenn Keflavíkur eru þar engir eftirbátar. Magnús Þórir Matthíasson brást félögum sínum í leik gegn Fram í gærkvöld þegar hann fékk að líta rauða spjaldið eftir að hafa stjakað við Jordan Halsman, leikmanni Fram.
Magnús Þórir þurfti að taka út sína refsingu í dag. „Ef leikmenn lenda í banni, fá rautt spjald eða uppsöfnuð gul spjöld þá þurfa þeir að koma með bakkelsi, pizzaveislu, grilla ofan í liðið eða eitthvað í þá áttina,“ segir Frans Elvarsson í samtali við Víkurfréttir.
Magnús mætti með pizzaveislu fyrir leikmenn Keflavíkur í dag sem gæddu sér kátir á Domino’s pizzum. „Þegar leikmenn eiga afmæli þá eiga þeir líka að koma með bakkelsi á æfingu,“ bætir Frans við en Sigurbergur Elísson átti afmæli í gær og kom því með köku á æfingu. Það var því sannarlega veisla á æfingu Keflvíkinga í dag.
