Hver var Örlygur Sturluson?

Heimildarmyndin Ölli fengið góðar viðtökur

Keflvíkingurinn Garðar Örn Arnarson hefur undanfarið eitt og hálft ár unnið að metnaðarfullu verkefni þar sem ævi Njarðvíkingsins Örlygs Arons Sturlusonar er viðfangsefni heimildarmyndar sem Garðar leikstýrir. Örlygur sem var einn efnilegasti körfuboltamaður þjóðarinnar, lést aðeins 18 ára gamall árið 2000. Myndin verður sýnd nú um Ljósanæturhelgina en þar fá áhorfendur að kynnast lífi Örlygs í gegnum fjölskyldu, vini og aðra sem þekktu til hans. En hver var þessi efnilegi leikmaður sem heillaði alla sem urðu á vegi hans? Eyþór Sæmundsson blaðamaður Víkurfrétta fór yfir stuttan en farsælan feril Örlygs Arons. Hér að neðan má sjá brot af greininni sem er í prentútgáfu Víkurfrétta í dag.

Örlygur Aron var kominn af mikilli körfuboltafjölskyldu. Faðir hans, Sturla Örlygsson, var sigursæll leikmaður sem lék með og þjálfaði nokkur íslensk lið í gegnum tíðina. Þó lék hann lengst af með Njarðvík þar sem systkini hans léku einnig við góðan orðstír. Snemma kom í ljós að Örlygur bjó yfir miklum hæfileikum í íþróttinni sem fjölskylda hans unni svo heitt. Hann sjálfur átti miklar fyrirmyndir í föður sínum og frændum og keppnisskapið var Örlygi í blóð borið.

Hann var ákaflega sterkbyggður miðað við aldur og var hann snemma frambærilegur í öðrum íþróttum, m.a. í fótbolta. Örlygur hafði náttúrulega hæfileika þegar kom að körfubolta. Hann var með góðan leikskilning og leikni hans með boltann var afburðagóð. Hann hafði alltaf orð á sér fyrir að vera frábær varnarmaður og var hann lunkinn við það að stela boltanum af andstæðingum sínum.

Örlygur fékk tækifæri til þess að leika í Bandaríkjunum. Hann hafði vakið athygli fyrir vasklega framgöngu með yngri landsliðum Íslands og var í kjölfarið boðið að sækja körfuboltabúðir í New Jersey árið 1997. Þar hreifst fyrrum NBA leikmaðurinn, og þáverandi þjálfari framhaldsskólaliðs í Norður Karólínu mjög af leik Örlygs. Kappinn sá heitir Bobby Jones og átti hann farsælan feril með liði Philadelphia 76-ers í NBA-deildinni þar sem hann var hvað þekktastur fyrir öflugan og oft harkalegan varnarleik. Örlygur ákvað að taka boði Bobby Jones um að koma og spila með liðinu sem heitir Charlotte Christian Knights. Ekki leið á löngu þar til Örlygur fór að láta finna fyrir sér í vöggu körfuboltans. Þar náði hann strax fótfestu í sterku liði skólans og sýndi fljótlega leiðtogahæfileika.

Nánar er fjallað um Örlyg Aron og m.a. rætt við leikstjórann Garðar Örn og Loga Gunnarsson félaga Örlygs, í Víkurfréttum sem koma út í dag. (bls.25)

Myndin um Örlyg er til sýningar í SAM-bíóinu í Keflavík um helgin.

Hér er netútgáfa af greininni.