Gýgur myndaðist eftir sprenginguna

Virka sprengjan sem fannst á Vogaheiði á Reykjanesi sl. föstudag var bandarísk M56 sprengjuvarpa sem innihélt 1,75 kíló af TNT. Samkvæmt upplýsingum sprengjudeildar Landhelgisgæslunnar voru slíkar sprengjuvörpur gerðar til að springa í lofti eða með snertingu við hart yfirborð og var drægni þeirra allt að 850 metrar.
Á vefsíðu Landhelgisgæslunnar segir að slík vopn hafi gjarnan verið notuð af bandarískum landgönguliðum á sjötta áratug síðustu aldar og á meðan Víetnamstríðið stóð yfir. Vopn svipaðrar gerðar eru notuð enn þann dag í dag.
Svæðið þar sem sprengjuvarpan fannst var notað sem skotæfingasvæði Varnarliðsins frá lokum seinni heimstyrjaldarinnar fram á miðjan sjötta áratug síðustu aldar og nær það yfir 15 ferkílómetra á milli Vogaheiði og Fagradalsfjalls. Það var notað sérstaklega til þjálfunar og æfinga með mismunandi vopn, allt að 105 mm. sprengjukúlur. Síðan svæðinu var lokað hefur Varnarliðið gert tilraunir til að hreinsa það.
Árið 1986 framkvæmdi Varnarliðið yfirborðsskoðun og hreinsun á hluta svæðisins í samstarfi við sprengjudeild Landhelgisgæslunnar. Þá fundust 600 virkar sprengjur. Í framhaldi af því voru sett upp varúðarskilti í samstarfi við utanríkisráðuneytið. Flest þeirra skilta hafa því miður horfið og er mjög brýnt að endurnýja þau.
Síðan 1986 hefur sprengjudeild Landhelgisgæslunnar gert nokkrar rannsóknir á svæðinu og nýlega hóf sprengjudeildin hreinsun við Snorrastaðatjarnir. Sérstök tæki eru notuð við leit, bæði í jarðvegi og undir vatnsyfirborði tjarnanna. Þetta ferli tekur tíma og þrátt fyrir að sprengjudeildin beiti bestu tækni sem fáanleg er til að leita og hreinsa svæðið er alltaf hætta á að virkar sprengjur leynist þar.

Ljósmynd/Landhelgisgæslan: Hér má sjá gíginn sem myndaðist eftir sprenginguna.