Flugvélaeldsneyti ekið á tankbílum frá Örfirisey til Keflavíkurflugvallar-Um 133 þúsund tonn á ári

Þúsundir tonna af fljótandi eldsneyti er ár hvert flutt um helstu umferðaræðar höfuðborgarinnar með stórum tankbílum og um Reykjanesbraut til Suðurnesja. Þar er aðallega um flutninga á þotueldsneyti að ræða til nota á farþegaþotur sem afgreiddar eru á Keflavíkurflugvelli. Visir.is greindi frá.
Mikill fjöldi alvarlegra umferðaslysa og umræða um breikkun Reykjanesbrautar, hlýtur því að vekja upp spurningar um hvers vegna svo miklu álagi sem olíuflutningarnir eru á brautinni sé ekki létt af og þeir færðir yfir á skip. Þá vakna ekki síður spurningar um þá áhættu sem tekin er með að aka stórum tankbílum með allt að 40 tonn af bráðeldfimu flugvélaeldsneyti innanborðs um mestu umferðaæðar og mesta þéttbýlissvæði landsins, allt árið um kring.
Á árinu 1999 voru flutt til landsins 132.587 tonn af þotueldsneyti til landsins samkvæmt upplýsingum Þjóðhagsstofnunar. Þar af fara um 45 þúsund tonn árlega um Hafnarfjarðarhöfn þar sem Olíufélagið Esso og Olís hafa aðstöðu. Um 97.600 tonn fara því væntanlega í gegnum birgðastöð í Reykjavík, þar sem Skeljungur hefur aðstöðu, en það félag sér m.a. um að fóðra allar flugvélar Flugleiða og Flugfélags Íslands af eldsneyti. Þannig flutti Skeljungur um 80 þúsund
tonn frá Örfirisey til Keflavíkurflugvallar á síðasta ári auk eldsneytis sem flutt er út á Reykjavíkurflugvöll. Allt þetta þotueldsneyti, eða steinolía eins og hét í eina tíð, er flutt með bílum í gegnum mesta þéttbýlissvæði landsins.
Kristinn Björnsson, forstjóri Skeljungs, gagnrýndi Pétur Jóhannsson, hafnarstjóra hjá Hafnarsamlagi Suðurnesja (HASS) fyrir ummæli hans um að rekja mætti slaka stöðu samlagsins til þess að olíufélögin nýttu ekki aðstöðu sem boðið hafi verið upp á í Helguvík. Taldi Kristinn í samtali við DV fyrir áramótin að Pétur væri þannig að koma sök á erfiðri fjárhagsstöðu HASS á einhverja aðra en rekstraraðila hafnanna.
Í frétt DV á Þorláksmessu sagði Pétur Jóhannsson m.a.: „Á sama tíma og tilbúin höfn er í Helguvík og búið er að bjóða olíufélögum afnot af olíutönkum Varnarliðsins þar, þá er öllu flugvélaeldsneyti ekið á tankbílum frá Örfirisey í gegnum höfuðborgarsvæðið um Reykjanesbraut til Keflavíkurflugvallar.“
Kristinn Björnsson benti hinsvegar á að Benedikt Ásgeirsson, skrifstofustjóri Varnarmálaskrifstofu utanríkisráðuneytisins, hafi ekki svarað erindi Skeljungs, þrátt fyrir að Varnamálaskrifstofa hafi að fyrra bragði ritað olíufélögunum bréf og boðið fram aðstöðu í olíubirgðastöðinni í Helguvík til borgaralegra afnota. Olíufélagið hf. Esso og Olís eru með sameiginlegt dreifikerfi og flutninga á flugvélaeldsneyti með Olíudreifingu hf. Skeljungur hf. (Shell) er síðan með annað dreifingarkerfi fyrir sínar olíuvörur.
Nánast allt reglubundið flug til og frá Íslandi tengist Keflavíkurflugvelli. Á flugvellinum er neðanjarðardreifikerfi eldsneytis sem tengt er birgðastöð skammt frá flugstöðinni. Sem dæmi um hvað flugvélarnar taka mikið, þá fór stærsta einstaka afgreiðsla Olíufélagsins Esso hf. fram þann 27. júní 1994 þegar 180.647 lítrar (nærri 181 tonn) voru afgreiddir inn á rússneska Antonov 124 flugvél. Þurfti fimm stóra tankbíla til að fylla á tanka þessarar einu vélar, en hver þeirra ber 40
þúsund lítra af eldsneyti.