Samkaup skoðar 10-11
„Þetta eru gögn sem eru opin þeim sem áhuga hafa. Hvað kemur út úr því veit maður ekki. Við útilokum ekkert á þessari stundu,“ segir Ómar Valdimarsson, framkvæmdastjóri Samkaupa í Morgunblaðinu í dag, aðspurður hvort fyrirtækið hafi áhuga á að kaupa 10-11 verslanakeðjuna út úr Högum.
Ómar ítrekar að of snemmt sé að fullyrða nokkuð um hvort kaupin verði íhuguð frekar en ljóst er að með þeim myndi hlutdeild Samkaupa á markaðnum aukast úr um 15% í 19%, sé stuðst við nýlegar tölur Samkeppniseftirlitsins.
Spurður hvort Kaupás, sem á og rekur Nóatún, Krónuna og 11-11 keðjuna, hafi áhuga á 10-11 keðjunni svarar Eysteinn Helgason, framkvæmdastjóri fyrirtækisins, því til að hann tjái sig ekki að svo stöddu.
