Samkaup lækka verð á yfir 600 vörum í Krambúðinni og Kjörbúðinni

Samkaup hefur lækkað verð á yfir 600 vörum í Krambúðinni og Kjörbúðinni um land allt. Þetta kemur fram í tilkynningu frá fyrirtækinu.

„Það er fagnaðarefni að geta lækkað vöruverð á tímum sem þessum, þegar gengi krónurnar hefur lækkað um 11% frá því í júlí með tilheyrandi verðhækkunum á innfluttum vörum,“ segir Gunnar Egill Sigurðsson, framkvæmdastjóri verslunarsviðs Samkaupa í tilkynningunni. „Við erum í samstarfi við stærstu verslunarkeðju Danmerkur og með sameiginlegum innkaupakrafti okkar og þeirra og með auknu vöruúrvali náum við að flytja inn vörurnar með mun hagkvæmari hætti en ella - viðskiptavinum okkar til hagsbóta.“

Vörurnar eru sem fyrr segir yfir 600 talsins en um er að ræða vörumerkin X-tra, Coop og Änglamark, sem eru gæðavörur en mun ódýrari en sambærilegar merkjavörur. Í langflestum tilvikum er verðið á þessum vörum í Krambúðinni og Kjörbúðinni það sama og í lágvöruverðsversluninni Nettó.

Samkaup reka ríflega 60 verslanir víðs vegar um landið. Þær spanna allt frá lágvöruverðsverslunum til þægindaverslana. Helstu verslanamerki Samkaupa eru Nettó, Kjörbúðin, Krambúðin, Háskólabúðin, Iceland og Samkaup Strax.