Nýr framkvæmdastjóri Lífeyrissjóðs Suðurlands

Stjórn Lífeyrissjóðs Suðurlands samþykkti einróma á stjórnarfundi í dag að ráða Gylfa Jónasson sem nýjan framkvæmdastjóra Lífeyrissjóðs Suðurlands. Gylfi mun hefja störf í apríl 2006. Þetta kemur fram í tilkynningu frá lífeyrissjóðnum.

Gylfi Jónasson hefur gegnt stöðu framkvæmdastjóra Lífeyrissjóðs Vesturlands undanfarin fimm og hálft ár, en hann tók við því starfi í september 2000. Hann starfaði áður sem deildarstjóri hjá Lífeyrissjóði stofnana Sameinuðu þjóðanna í New York (1997-2000) og sem deildarstjóri í fjármáladeild aðalskrifstofu Sameinuðu þjóðanna (1992-1997). Gylfi er viðskiptafræðingur frá Háskóla Íslands, með framhaldsmenntun (MBA) frá Bandaríkjunum. Hann hefur einnig hlotið löggildingu í verðbréfamiðlun (júní 2005). Gylfi, sem er 45 ára, er giftur Ásdísi Kristmundsdóttir, sérfræðingi hjá Einkaleyfisstofu og eiga þau tvær dætur 10 og 14 ára.

Fráfarandi framkvæmdastjóri er Friðjón Einarsson.