Mikill áhugi á þátttöku í Hönnunarmars 2015

Mikill áhugi er meðal hönnuða á Suðurnesjum á þátttöku í Hönnunarmars sem fram fer helgina 12. - 15. mars n.k. en verkefnið verður kynnt á hádegisfundi í Eldey á morgun, föstudaginn 27. febrúar kl. 12 - 13:00.

Maris, hönnunarklasi Suðurnesja stendur fyrir sýningunni í samstarfi við Markaðsstofu Reykjanes og Reykjanes jarðvang en yfirskrift sýningarinnar er: Upplifðu sköpunarkraftinn á Reykjanesi.

Að sögn Dagnýjar Gísladóttur verkefnastjóra Maris verður Reykjanesið í forgrunni sýningarinnar enda mikill kraftur á svæðinu.

„Okkur fannst tilvalið að tengja þetta við náttúruna og kraftinn sem býr á svæðinu sem mótar bæði menn og verkin þeirra. Það er mikil orka í hönnun á svæðinu og mikil gerjun hjá hönnuðum sem við viljum koma á framfæri enda er það eitt af markmiðum Maris að efla hönnun á Suðurnesjum og auka nýsköpun“.

Í dag starfa 13 hönnuðir í Maris en meðal verkefna sem klasinn hefur staðið fyrir eru hönnunarsýning í Duushúsum sumarið 2014, sýning á Ljósanótt, útgáfa á veglegu kynningarriti og skráning hönnuða í gagnagrunn svo eitthvað sé nefnt.

„Við stefnum á námskeið og fyrirlestra um vörumerki og markaðsmál í vor sem oft brennur á hönnuðum og þá er önnur sýning í farvatninu auk þess sem unnið verður að því að koma hönnun á Suðurnesjum betur á framfæri á netinu, þannig að það er spennandi ár framundan hjá Maris og viljum við hvetja sem flesta hönnuði til þess að taka þátt og nýta sér þennan stuðning“.