Vilja fleiri raddir í kórinn

„Karlakór Keflavíkur hefur jafnan starfsár sitt við undirbúning Ljósanætur. Þá hittumst við karlarnir og og dustum rykið af söngröddunum,“ segir Þorvarður Guðmundsson, sem tók við  sem formaður karlakórsins í sumar. Þorvarður hefur sungið með kórnum meira og minna frá því að hann flutti aftur heim fyrir sex árum. Áður söng hann með karlakórnum Lóuþrælum í Húnaþingi vestra og var líka formaður hans á tímabili.

Opnar æfingar
Karlakór Keflavíkur söng tvisvar á Ljósanótt; fyrst við opnun ljósmyndasýningar Jóns Tómassonar, en Jón var stofnfélagi karlakórsins og fyrsti formaður hans. Síðan söng kórinn samkvæmt hefðinni í Bíósal á laugardeginum. „Við ætlum að byrja vetrarstarfið að þessu sinni á því að halda svokallaðar opnar æfingar þar sem við bjóðum nýja söngmenn sérstaklega velkomna. Æfing var mánudagskvöldið 15. september og verður aftur í kvöld, 18. september í Karlakórshúsinu á Vesturbraut. Æfingar hefjast kl. 19:30. Þá ætlum við að syngja ýmis lög sem kórinn hefur verið með á söngskrá sinni í gegnum tíðina,“ segir Þorvarður.

Fjölmennt kóramót framundan
Að jafnaði eru um 30 karlar sem stunda kóræfingarnar en hópinn langar til að verða svolítið fjölmennari og þá sérstaklega í ljósi þeirra verkefna sem eru framundan. „Haustið 2015 ætlar kórinn að halda Kötlumótið sem er kóramót sunnlenskra karlakóra og þá eigum við von á fjölda kóra hingað á svæðið og höldum m.a. sameiginlega tónleika þar sem við syngjum í um 600 manna kór.“  Guðlaugur Viktorsson tók aftur við sem kórstjóri í haust eftir tveggja ára nám í Danmörku. Þorvarður segir Guðlaug hafa ýmsar skemmtilegar hugmyndir fyrir Kötlumótið sem vonandi geti orðið að veruleika. „Að vera í karlakór snýst ekki bara um söng heldur er þetta heilmikið félagsstarf líka. Við höldum pungakvöld á haustmánuðum, árshátíð, förum í ferðir og höldum stuðkvöld með óvæntum uppákomum. Þá förum við í æfingabúðir þar sem við undirbúum jólatónleikana, vortónleikana og fjölmargt fleira,“ segir Þorvarður og hvetur alla karla sem hafa gaman af því að syngja að kíkja á æfingu.