Við áramót: Sissi fór loksins á skeljarnar

Hjá fjölskyldu Fríðu Stefánsdóttur var einu sinni alltaf farið í áramótaleik þar sem allir skrifuðu niður áramótaheit sem var svo skoðað ári seinna til að gá hvernig til hafi tekist.

 

Hvaða stendur upp úr í einkalífi þínu á árinu?

Sissi maðurinn minn fór loksins á skeljarnar og trúlofuðumst við núna í nóvember. Ég fékk nýja vinnu sem deildastjóri við Sandgerðisskóla en ég hef verið kennari þar í tíu ár. Svo náði ég líka inn í bæjarstjórn í sveitarstjórnarkosningunum en þar hafa verkefnin verið mörg og þá sérstaklega í kringum sameininguna. Það sem stóð líka upp úr er árangur stjúpbarna minna. Elsti strákurinn útskrifaðist og hóf nám við Háskólann á Akureyri og elsta stelpan útskrifaðist sem stúdent núna í desember úr FS. Þetta árið fermdist líka næst yngsta stelpan og yngsta skottan er alltaf að slá í gegn í öllu sem hún tekur sér fyrir hendur.  2018 var í alla staði alveg frábært og afreksmikið ár.    

 

Fagnaðir þú ákveðnum áfanga eða byrjaðir þú á einhverju nýju 2018?

Ég byrjaði í nýrri vinnu og hóf lokaáfangann í meistaranámi mínu MPA í opinberri stjórnsýslu. Ég byrjaði líka í Alpha gym sem er klárlega ein besta ákvörðun 2018. Frábær staður sem ræktar mann að innan sem utan. Alveg æðislegt starfsfólk. 

 

Hvað fannst þér stóra fréttin á landsvísu? 

Leiðinlegt hvað neikvæðar fréttir sitja lengur í manni en ég verð að nefna að Klausturmálið hafi verið það fréttaefni sem situr hvað mest í mér. 

 

Hvað fannst þér stóra fréttin í nærumhverfi þínu?

Klárlega að Reynismenn unnu alla leikina sína í sumar og urðu Íslandsmeistarar í 4. deild karla.  

 

Hvað ætlar þú að borða um áramótin? 

Ég bara veit það ekki. Ég er í mat hjá tengdó um áramótin og hefur matseld þeirra aldrei klikkað. Júlla og Jón Bjarni eru algjörir snillingar í eldhúsinu. 

 

Eru einhverjar áramóta / nýárshefðir hjá þér? 

Hjá fjölskyldu minni var einu sinni alltaf farið í áramótaleik. Allir skrifuðu niður eitt áramótaheit og svo voru þau lesin upp ári seinna og giskaði þá hver og einn, á það hvað hver hafði sett sér sem áramótaheit síðast.  

 

Strengir þú áramótaheit?

Nei ég get ekki sagt það. En ég er mjög dugleg í markmiðasetningu og set mér lengri og styttri tima markmið regulega. Svo er bara stærsta markmiðið að læra af hverjum degi og alltaf að horfa fram á veginn.