Verður alveg einstakt sumar

Thelma Rún Matthíasdóttir er 16 ára stúlkukind úr Keflavík. Hún hlakkar til sumarsins sem hún telur að verði alveg einstakt í ár. Hún ætlar sér að vinna í bæjarvinnunni en auk þess er hún í hlutastarfi hjá ömmu sinni sem rekur matvælafyrirtækið Gott í kroppinn. Það versta við sumarið að mati Thelmu, er hversu lengi það er á leiðinni, að öðru leyti er það frábært. Thelma svaraði nokkrum spurningum Víkurfrétta varðandi sumarið.

Hvernig leggst sumarið í þig?

Er farin að hlakka alveg þvílíkt til að skólinn sé að verða búinn og allt fjörið sé að byrja þótt sumarið sé kannski smá seint á ferðinni akkúrat núna.

Hvar verður þú að vinna í sumar?

Ég verð eitthvað í bæjarvinnunni og svo hjá ömmu í Gott í kroppinn ehf, en maður er að leita sér að einhverju skemmtilegu til að gera í sumar.

Hvernig á að verja sumarfríinu?

Held að ég ætli bara að taka því rólega í fótboltanum, blakinu og vinnunni, svo auðvitað eitthvað skemmtilegt með vinunum, held að þetta verði alveg einstakt sumar!

Á að ferðast innan- eða utanlands?

Ætla að ferðast alveg fullt innanlands en utanlands ferðalög geymi ég fram á vetur bara.

Hvað einkennir íslenskt sumar?

Held að það séu allir sammála mér þegar ég segi einstaklega lengi að koma.

Hvað á að gera um verslunarmannahelgina?

Ekkert planað eins og er, kannski maður tjaldi einhvers staðar með vinunum. Hver veit?

Áhugamál þín?

Ég er algjör listamaður, ég elska að mála og hef áhuga á öllu sem kemur ímyndunaraflinu við. Svo eru það auðvitað íþróttir sem eru algjörlega númer 1, 2 og 3 hjá mér.

Áttu þér einhver áhugamál sem þú stundar bara á sumrin?

Ætli það sé ekki bara að liggja í sólinni og leyfa sér að fá smá lit.

Þegar þú heyrir orðið sumarsmellur, hvaða lag kemur upp í hugann?

Eitthvað skemmtilegt sumarlag með Friðriki Dór.

Hvað er það besta við íslenskt sumar?

Gott grillveður á kvöldin, það gerist varla betra en það.

En það versta?

Hvað það er hrikalega lengi að koma, alltaf þessi blessaða rigning hérna.

Hvað fer á grillið hjá þér í sumar?

Pulsur, kjúklingur og kjötbitar, allt mögulegt held ég. Auðvitað skellir maður svo bönunum með súkkulaði á grillið í eftirrétt einhver kvöldin, það er alltaf lang best.

Sumardrykkurinn?

Óáfengur mojito eða Sprite og ávaxtasafablanda sem ég blandaði í fyrrasumar, það verður lengi í uppáhaldi held ég.